Suenter che la radunanza communala da Segl en Engiadin’Ota ha decidì la fin da zercladur da quest onn da dir Na a la nova lescha communala da segundas abitaziuns, èn sa mess ensemen differents exponents da la vischnanca per «salvar» ina part da la lescha.
La lescha refusada
Dus puncts da la lescha eran sa cristallisads ora durant las decleraziuns da la suprastanza communala:
- Transfurmar emprimas abitaziuns en segundas abitaziuns: Quai na duess betg pli esser pussaivel, era suenter che questas abitaziuns eran vegnidas duvradas 20 onns sco emprimas abitaziuns.
- Era sche ina chasa d'abitar vegn spazzada e reconstuida avess quai dà ina quota d'emprimas abitaziuns da 50%. Vul dir per exempel, sch'ina chasa veglia vegn fatga giu cumplettamain e reconstruida, duai la mesadad da las novas abitaziuns esser da quellas per indigens. Cun in pajamaint avessan ils possessurs u possessuras da las chasas pudì sa cumprar liber da questa quota.
Tenor ils iniziants e las iniziantas na saja betg vegnì discutà detagliadamain dals singuls midamaints proposts. Suenter ina discussiun rudimentara ed ina dumonda da decider subit davart la lescha, saja quella vegnida scrutinada e refusada.
L'iniziativa vul «salvar» las emprimas abitaziuns
Cun questa iniziativa vulan ils bundant 120 ch'han suttascrit turnar sin il stadi d’avant il 2018, cur che la vischnanca da Segl ha decidì da pussibilitar questas midadas d’utilisaziun. Las abitaziuns vegnan numnadamain duvradas da persunas e famiglias indigenas. Cun reservas da terren da bajegiar stgars sajan tenor ils iniziants questas abitaziuns centralas per ina vischnanca viva. Sche las abitaziuns vegnan suenter quels 20 onns en segundas abitaziuns, na saja quai betg bun per la vischnanca ed ils abitants ed abitantas da Segl.
