A Segl hai dà in cler Na a las mesiras en favur d'emprimas abitaziuns, proponidas da la suprastanza. La decisiun a la radunanza communala da venderdi saira è stada clera: 111 Na e 26 Gea, plus ina vusch nunvalaivla.
Avant aveva l'associaziun da proprietaris da chasas da l'Engiadin'Ota crititgà las midadas previsas en la lescha davart las abitaziuns secundaras.
Emprimas abitaziuns che vegnan cumprovadamain nizzegiadas gia dapi 20 onns na duevan betg pli avair la pussaivladad da vegnir transfurmadas en ina segunda abitaziun cun pajar ina taxa substitutiva, uschia la vischnanca.
La lescha prevesa actualmain che, tar renovaziuns u reconstrucziuns massivas vi dad objects, ston vegnir fabritgadas 50% emprimas abitaziuns, ma cun pajar 1’500 francs per meter quadrat han ins la pussaivladad da cumprar liber quella obligaziun.
La suprastanza aveva proponì d’abolir quella pussaivladad, quai per mantegnair meglier las emprimas abitaziuns.
Plinavant ha Segl ditg cleramain Gea al credit supplementar da passa 180'000 francs per l'ospital a Samedan ch'è en las stretgas.
