Oksana e Sascha Koroliak, mamma e figlia, èn fugidas da la guerra. Il bab da Sascha è restà en Ucraina per cumbatter cunter ils Russ. Sascha che ha 10 onns ha grev d'acceptar il fatg che ils creschì fan guerra e che ella ha stuì bandunar causa quai sias conscolaras, ses bab, nona e non.
Mamma e figlia han chattà dimora a Ramosch tar la famiglia da Hanna Harahata, oriunda da l'Ucraina e che viva dapi 4 onns cun ses partenari e lur dus uffants a Ramosch. Per Hanna era svelt cler che els gidan a las fugitivas. Els han plaz en chasa e Hanna discurra ucranais – premissas optimalas.
Oksana, la fugitiva cun sia figlia, era sco buoba gia ina fitg buna amia da Hanna. Quai è segir il motiv principal che ellas èn fugidas fin a Ramosch e na forsa a Turitg u Vienna.
La cusrina da Hanna, Violetta, prova era da mitschar cun sia figlia che ha 9 onns da rivar a Ramosch. La fugia e però pli greva che spetgà. La cità da Chirkow en l'ost da l'Ucraina èn ellas stadas bunas da bandunà però igl è grev da chattar benzin per cuntinuar la fugia. Violetta Panchenko raquinta al telefon che ellas dumognan planet vinavant e che forsa arrivan ellas anc quest'emna a Ramosch.