Il dumber da letgs en ils center federals d’asil ha la Svizra pudì augmentar aifer paucas emnas da 4’000 sin radund 9’000. Actualmain dettia anc ina reserva da 1’500 letgs, ha ditg il Secretariat da stadi per la migraziun. Ins saja a la tschertga d’ulteriurs plazs, actualmain saja l’alloschi per las dunnas ed ils uffants fugids da l’Ucraina dentant garantì.
Chantuns giavischan repartiziun guliva
Ina sfida saja da reparter las persunas fugidas sin ils chantuns. Quai duai succeder guliv sur tut ils chantuns, hai gì num da la Conferenza dals directurs e da las directuras chantunalas dals affars socials. I na fiss betg bun sch’ils fugitivs restassan en ils chantuns cun grondas citads. Perquai duai valair. la clav da repartiziun dal normal sistem d’asil. E quai era per minorens betg accumpagnads e per persunas zunt vulnerablas ord l’Ucraina.
Ord vista da las polizias chantunalas èsi impurtant, ch’i dettia ina controlla da segirezza da las persunas fugidas. Per quella è responsabel il Secretariat da stadi per la migraziun.
