Enfin uss sajan mo singuls fugitivs da l'Ucraina arrivads en il Grischun, di Marcel Suter, il manader da l'Uffizi per migraziun grischun. Quels hajan chattà suttetg tar parents u amis. Il chantun quinta dentant ch'el stoppia dar suttetg a fin 7'500 persunas – tut tenor il svilup da la guerra. En total quintian organisaziuns internaziunalas cun fin 15 milliuns fugitivs. Uschia ch'er la Svizra ed il Grischun èn vid sa preparar. Il mument na saja il Grischun anc insumma betg pront per in tal dumber.
Il mument vegnan ils fugitivs en furma da guttins. Quests guttins daventan entant pli e pli gronds guts.
A curta vista haja il Grischun plaz per radund 600 fugitivs, uschia Marcel Suter. Ins saja dentant vidlonder da preparar alloschis per pudair prender si dapli glieud e quai cun tutta forza. Er sajan ins vidlonder da tschertgar persunal che po tgirar ils fugitivs. Quai saja dentant ina gronda sfida, cunzunt perquai che blers sajan traumatisads da la guerra e dovrian tut tenor er sustegn psicologic. E là manchia il persunal gia uss. Il chantun saja en tut ils reguards vid cooperar er cun la Confederaziun per sclerir bleras dumondas avertas.
Privats vulan dar suttetg a fugitivs
Sche propi il grond dumber da fugitivs avess da vegnir en il Grischun, lura è il chantun er dependentent dad agid da privats. Gia ussa sajan persunas privatas s'annunziadas tar il chantun per offrir in suttetg a fugitivs. Quels stoppian dentant spetgar per il mument, di Marcel Suter.
I vegn a dar ina centrala en il Grischun, nua che persunas pon s'annunziar, sch'ellas vulan dar suttetg a fugitivs. Quellas contactain nus lura, sch'il basegn è qua.
Sch'ins vul prender si fugitivs stoppian ins dentant esser pertschert che la glieud è tut tenor traumatisada e ch'i n'è betg fatg cun mo metter a disposiziun in letg u in'abitaziun. Tuttina punctuescha Marcel Suter ch'il chantun è led per mintga annunzia da privats. I dovria ussa simplamain anc in zic pazienza enfin che tut ils process funcziunian.