Gia il 2021 era avant maun in project general cun ina varianta da tunnel per augmentar la segirezza sin quest traject. Il medem onn hai dà opposiziun cunter il project per in tunnel: proprietaris da terren da Segl han crititgà ch'il chantun n'haja betg integrà els en la discussiun. Els han temì che las differentas parcellas pertutgadas possian perder valita.
Ils plans d'avant trais onns han anc previs ina lunghezza totala da 2,2 kilometers.
Sin fundament da las posiziuns da la Cumissiun federala per la protecziun da la natira e da la patria (CFNP) sco er da las organisaziuns da l'ambient chantunalas e naziunalas ha l'Uffizi da construcziun bassa reelavurà anc ina giada questa varianta e prolungà il tunnel en direcziun da Plaun da Lej sin total 2,7 kilometers.
Cun la nova lingia pudess il trassé existent vegnir duvrà sco colliaziun attractiva dal traffic betg motorisà.
Er en in auter traject duai vegnir adattà
Sco ulteriura adattaziun a la via da Malögia prevesa la regenza plirs schlargiaments tranter l'access Segl Föglias e la rundella Silvaplauna. Là è la via en in nausch stadi. Cun sia ladezza da 5 fin 6 meters na correspunda ella plinavant betg pli a las pretensiuns actualas da la segirezza dal traffic. L'amplificaziun dal traject d'ina lunghezza da radund 2 kilometers prevesa divers schlargiaments da stortas sco er mintgamai in vial da velo en tuttas duas direcziuns. Per la nova lingia vegn da princip utilisà il trassé da la via existenta.
Ils custs per tuts dus projects importan circa 310 milliuns francs.