Era sch'il project stat anc pir a l’entschatta pretendan possessurs da terren da Segl dapli cooperaziun. Quai tenor ina charta dad in advocat messa a disposiziun era a las medias. Entras quest project fissan pertutgadas differentas parcellas e quellas pudessan tenor ils possessurs perder valita.
Anc in project «general» e betg «d'exposiziun»
Reto Knuchel, il schef da l'Uffizi da construcziun bassa dal chantun Grischun ha ditg envers RTR ch'i sa tractia qua d'in project general e betg anc dad in project d’exposiziun. Perquai sajan fin oz vegnids contactads las vischnancas, la regiun ed organisaziuns d'ambient per avair ina prima posiziun da quels. Cur ch'il project vegnia transfurmà en in project d’exposiziun dettia era per possessurs e pertutgads la pussaivladad da prender posiziun sco er da far eventuals recurs.
Il project prevesa in tunnel da radund 2,2 kilometers lunghezza tranter Segl e Plaun dal Lej. Quel dess proteger la via principala da Malögia encunter crudada da crappa e lavinas. La via sto vegnir serrada regularmain per motivs da segirtad.
