Il Tribunal federal a Losanna ha lubì la renovaziun d'abitaziuns dispitaivla. Planisà èsi da fabritgar ord 22 abitaziuns existentas 14 abitaziuns da luxus. La fundaziun Helvetia Nostra aveva recurrì cunter la decisiun fin tar il Tribunal federal ed ha ussa pia pers. La fundaziun Helvetia Nostra s'engascha per la protecziun da la natira e da la patria. Ella tema che spazi d'abitar per indigens giaja a perder entras il project da la Chesa Faratscha. A Schlarigna èn actualmain passa 70% da las abitaziuns gia abitaziuns secundaras.
Tribunal federal na vesa nagina raschun che discurra cunter il project
Il Tribunal federal ha refusà il recurs dal tuttafatg ed argumentescha che la lescha dad abitaziuns secundaras lubeschia da transfurmar abitaziuns ch'èn vegnidas bajegiadas avant il 2012 era en abitaziuns secundaras. Ils derschaders na vesan nagina raschun da refusar la lubientscha da bajegiar. Uschia po il project vegnir realisà. Cunquai che tut las paraids internas purtantas restian, e perquai che la surfatscha d'utilisaziun principala na vegnia betg engrondida, sa tractia d'ina midada da construcziun lubida. Quai malgrà la quota auta dad abitaziuns secundaras a Schlarigna.
Ils custs da dretgira en l'autezza da 2'000 francs sto pajar la recurrenta, pia la Helvetia Nostra. Uschia sto ella pajar a la «Neue Haus AG» ed a la vischnanca da Schlarigna ina indemnisaziun da 4'000 francs.
In project dispitaivel a Schlarigna
Il project da la Chesa Faratscha a Schlarigna aveva chaschunà lingias grassas en las medias. El valeva sco exempel da midar senza scrupels abitaziuns primaras en abitaziuns secundaras. Quai en ina regiun, nua ch'i regia gia ina mancanza d'abitaziuns. Sco reacziun sin l'eco medial e critica da pliras varts aveva la vischnanca da Schlarigna decretà ina zona da planisaziun sin il territori communal il 2022. Suenter che la vischnanca aveva però approvà il december la lescha da promover emprimas abitaziuns, era la zona puspè vegnida abolida.
