La sanaziun da luxus da la Chesa Faratscha a Schlarigna na vegn per entant betg realisada. Quai scriva la Posta Ladina. L'organisaziun Helvetia Nostra ha fatg recurs tar la dretgira administrativa grischuna cunter il permiss da construcziun da la vischnanca.
Fin che las construcziuns pon cumenzar pudessi quai pia anc durar in temp. La nova possessura è dentant optimistica ch'ins haja fatg tut confurm a la lescha e che la dretgira administrativa vegnia a renviar il recurs.
La Chesa Faratscha era vegnida avant bun in onn en las lingias grassas. Il cumplex cun 22 abitaziuns per indigens avess gì da vegnir sanà e transfurmà en mo pli 14 abitaziuns – dentant en in segment da pretsch fitg aut ed er utilisablas sco abitaziuns secundaras.
