L’avrigl da quest onn èn ils locataris da la chasa Faratscha a Schlarigna vegnids infurmads sur da la vendita da l’immobiglia. La nova proprietaria, la firma d’immobiglias Neue Haus AG ha lura fatg a savair, ch’ella vul sanar la chasa a moda luxuriusa e ch’i dat ord 22 abitaziuns d’indigens 14 segundas abitaziuns, quai mussan retschertgas da la Posta Ladina ed il schurnal regiunal da SRF. Sco il directur da la firma Neue Haus AG, Simon Vlachos ha ditg al schurnal regiunal dad SRF, sa laschan calcular ils custs da sanaziun be cun ina spierta da segundas abitaziuns.
Agid finanzial per locataris
Las 22 famiglias che stattan per il mument en la chasa Faratscha hajan survegnì la desditga per la primavaira da l’onn che vegn. Quai cun ina proposta d’ina cunvegna ch’ellas ed els survegnan agid finanzial sch’i fan midada fin la fin da mars dal 2023 e na fan betg recurs cunter la dumonda da fabrica. Ils ins hajan suttascrit la cunvegna, auters sa dostan, mussan las retschertgas. Quai bain savend ch’igl è difficil da chattar in’emprima abitaziun pajabla en l'Engiadin’Ota.
Vischnanca deplorescha agir
Sco Christian Brantschen, il president communal da Schlarigna ha ditg ad RTR, saja questa situaziun dischagreabla per tut ils pertutgads. Tuttina correspundia la vendita a la lescha, la vischnanca na po pia far nagut. Tenor il president communal da Schlarigna sajan ins però en discussiun per sclerir differentas pussaivladads sco ch’ins pudess intervegnir. Quai er sco consequenza sin la vendita da la chesa Faratscha. La strategia che Schlarigna va dapi plirs onns, è da construir sez abitaziuns pajablas per indigens. A la proxima radunanza communala decida il suveran davart ina lescha da promoziun da construcziun d’abitaziuns.
PS ed AdC dattan culpa per part a lescha da 2. abitaziuns
Il cusseglier naziunal Martin Candinas (AdC) sa vesa confermà: La lescha da segundas abitaziuns era per el gia d’emprim ennà in sbagl. Ed ussa sa mussia la problematica precis en quest cas. Cun quai n'è il cas Schlarigna per el nagina surpraisa. Ins haja adina admonì ch'i vegnia a dar in squitsch sin las abitaziuns primaras. Cunquai che la dumonda per segundas abitaziuns è creschida era durant la crisa da corona, è daventà il squitsch anc pli grond.
Era il cusseglier naziunal Jon Pult (PS) vesa en la lescha da segundas abitaziuns ina part dal problem. Dentant betg che quella exista sco tala, mabain ch'il parlament n’ha betg mess enturn quella sco quai ch'il pievel aveva approvà en l’iniziativa. Numnadamain era che tals cas sco Schlarigna vegnan evitads.
Jon Pult vesa dentant en emprima lingia il problem en la politica locala e chantunala. Sche quella avessia fatg endretg ses pensum en chaussa e cumbattì il problem da las speculaziuns d'immobiglias che procuran per mancanza d'abitaziuns per indigenas ed indigens. Lura n'avessia quai betg duvrà la lescha da segundas abitaziuns.
Che la politica locala duai vegnir pli activa di era Martin Candinas. Ina soluziun che tuts dus politichers vesissan èn cooperativas per la fabrica da novas chasas specificas per indigens. Talas sco quai ch’ins enconuscha da citads sco Turitg. Tenor Pult duessan las vischnancas cumprar il terren e fabritgar abitaziuns primaras pajablas sin quel per la populaziun indigena. Candinas vesas era zonas da fabrica ni quotas che duain procurar per fabrica da novas abitaziuns primaras.
Nagina soluziun perencunter vesa Candinas en adattar la lescha da las segundas abitaziuns. Tenor el faschess quai vegnir pli mala la situaziun. Auter vesa quai Jon Pult: Sche la politica locala na rivia betg da controllar la situaziun, lura pudessia in'adattaziun gidar. Per exempel sch’ins adattass la lescha uschia ch'il terren vegn protegì ch'ils custs na creschan betg anc pli fitg.
