La vischnanca da Lantsch è la possessura da las parcellas da bajegiar 210 e 218. Qua duessan vegnir construidas abitaziuns per indigens. En ina decisiun da princip ha la radunanza communala decidì las cundiziuns. Uschia duai il dretg da bajegiar valair per 100 onns, meter quadrat duair avair ina valur da 200 francs il meter quadrat ed il tschains dal terren duai sa basar sin il tschains da referenza da la confederaziun, il tschains minimal munta a 1,75%.
1'850 francs al mais per 4,5 stanzas
En collavuraziun cun il biro d’architectura Fanzun, vul la societad da construcziun da Lantsch construir sin ils 4'255 meters quadrat radund 20 abitaziuns per indigens cun garascha sutterana. Ils custs vegnan stimads sin radund 12 milliuns francs. Sche la vischnanca sa participescha vi dal project vegn decidì pli tard. En las dus chasas duai dar abitaziuns da 2,5 fin 4,5 stanzas. Per in’abitaziun da 4,5 stanzas quintan ils planisaders il mument cun custs da circa 1'850 francs.
Ulteriuras decisiuns positivas da la radunanza communala:
- Il hotel Sarain duai vegnir engrondì. La cifra d’utilisaziun è perquai vegnida augmentada per 272 meters quadrat.
- Il club da golf vul renovar diversa infrastructura ed engrondir la chasa da club. La surfatscha en dretg da construcziun duai vegnir engrondida per 176 sin nov 1'632 meters quadrat.
- Il plan d’avertura general da l’Arena da biatlon è vegnì adattà. Quel prevesa da stritgar la curva en il sid da la via da skis cun rodas ch’è gia vegnida schlargiada.
- L’artitgel 38 da la lescha da prada ed alpegiaziun vegnì adattà. Quai tar las modalitads per far giu quint cun las prestaziuns da lavur.
- Per electrifitgar il reservuar Cresta Stgoira e sanar dusvias da guaud èn vegnids approvads credits en la valur da radund 440’000 francs.