Il nov urari da tren da la Viafier retica ch’è dapi ils 15 da december 2024 en vigur, ha purtà per la maioritad da la clientella meglieraziuns, uschia l’infurmaziun da l’interpresa. Il temp da viadi ha pudì vegnir scursanì sin differents trajects e la stabilitad da l’urari e vegnida meglierada.
Dentant datti era lieus nua ch’il nov plan chaschuna chaus cotschens. Las colliaziuns directas da l’Engiadin’Ota en direcziun Cuira / Landquart, na prevesan numnadamain betg pli ina fermativa a Bever. La clientella ha perquai a disposiziun in bus che circulescha mintga mes’ura e transporta ils giasts a las staziuns cun fermativa.
Barat per era svidar il cor
Per che la populaziun da Bever haja la pussaivladad da discutar e sa barattar cun ils responsabels, ha la vischnanca envidà ad ina sairada da discussiun cun ils represchentants dals meds publics en Engiadina. Oravant tut il directur da la Viafier retica, Renato Fasciati ha empruvà da declerar las midadas da l'urari da tren en la sala a Bever bain emplenida.
Jau hai chapientscha che la dischillusiun è gronda ch’il tren che va tras il Vereina a Landquart na ferma betg pli a Bever. Dentant èn pliras colliaziuns da la purschida era vegnidas meglieradas e schlargiadas.
Las reproschas e reclamaziuns or dal public èn tuttas idas en la medema direcziun. Era propostas ed ideas nua ch’ins pudess spargnar temp per tuttina fermar il tren a Bever èn vegnidas preschentadas. Tenor Renato Fasciati vegnian singulas da quellas er examinadas suenter la sairada da discussiun. Autras ha il directur gist pudì excluder cun declerar las consequenzas da per exempel betg pli pudair garantir las colliaziuns per ils proxims trens.
Tut sa drizza vers San Murezzan
Nagina chapientscha n'han singulas persunas preschentas a Bever era gì a reguard il fatg che mintga tren haja dad ir sur San Murezzan. Quai n’haja betg be da far cun il servetsch als giasts che vegnan en Engiadina, mabain era per garantir ina colliaziun en direcziun Segl, Malögia, cun ina colliaziun vers la Val Bergiaglia, ha accentuà il directur da la Viafier retica.
Per la presidenta communala da Bever, Selina Nicolay saja stà impurtant che la populaziun haja pudì udir ord emprim maun il daco da las midadas da fermativa da tren ed era pudì plazzar las rabgias e frustraziuns en quest connex.
Che la situaziun vegnia a midar proximamain, dubitescha la gronda part dals preschents. Dentant duessi dar puspè ina fermativa a Bever a partir dal 2030/31 cura che la Viafier retica vul introducir trens svelts en Engiadina che penduleschan en il tact da mes’ura, uschia l’empermischiun da Renato Fasciati a la fin da la sairada.