A partir dals 15 da december 2024 dettia ina purschida pli gronda dal traffic public en il Grischun, scriva il chantun. Las Viafiers federalas reageschan sin la dumonda pli gronda: A partir da mez december datti mintga ura duas colliaziuns sveltas dal Grischun fin a Son Gagl. Quai na meglierescha betg mo la colliaziun cun la rait da traffic naziunala, mabain porscha era dapli flexibilitad per las viagiaturas ed ils viagiaturs. L'Engiadin'Ota survegn cun la proxima midada d'urari novas colliaziuns pli sveltas. Era vegn la rait da bus optimada, uschia ch'ins ha meglras pussaivladads per cuntanscher la regiun.
Dapli fermadas, trens pli tard la saira
Novaziuns datti sin la rait da las Viafiers federalas: Ils trens tranter Son Gagl e Sargans circuleschan da nov en il tact da mes'ura. Da nov vegnan ils temps da partenza dals trens directs IR 13 tranter Son Gagl – Sargans – Cuira spustads per ina mes'ura; partenza da Cuira a las xx.42; partenza da Son Gagl a las xx.55. Durant l'autra mes'ura midan las passagieras ed ils passagiers tren a Sargans. Tras quai sa reducescha il temp da viadi per Minca per 30 minutas.
Ils IR 35 tranter Bern – Turitg – Cuira ferman da nov er ad Unterterzen ed a Maiavilla. A differentas staziuns tranter Pfäffikon SZ e Cuira sa midan perquai las minutas d'arriv e da partenza (partenza da Cuira a las xx.11). Pli e pli vegnan en funcziun trens a dus plauns che porschan plazzas da seser supplementaras.
Meglieraziuns datti era durant las uras marginalas: La saira tard parta da nov mintga di a las 23.11 in tren davent da Cuira a Turitg ed a las 00.23 da Turitg a Cuira. Quai facilitescha il return d'ina occurrenza la saira u d'in meeting da fatschenta. Era la damaun datti novas colliaziuns tranter il Grischun e Turitg: A las 04.11 parta in tren da Cuira ed a las 05.12 da Turitg.
Sin la lingia IR 38 sa reducescha il temp da viadi da Cuira a San Murezzan per fin a set minutas. Ultra da quai vegn il RegioExpress da Landquart – Tavau prolungà mintg'ura fin a Filisur. Entaifer la regiun reducescha quai ils temps da viadi per fin a 30 minutas. Sin la lingia da la Surselva tranter Cuira e Glion vegn il tact da mes'ura prolungà fin a las 19.55, quai cun dus trens supplementars.
Dapli bus en Engiadin'Ota
En l'Engiadin'Ota profiteschan las passagieras ed ils passagiers da tut las lingias da bus d'in nov urari pli spess e da colliaziuns supplementaras. In highlight da la nova purschida è il tact da 10 minutas tranter Schlarigna e San Murezzan. Quella reducescha ils temps da spetga e pussibilitescha in'utilisaziun pli flexibla dal traffic public. Plinavant vegnan ils numers da las lingias adattads e lur nums midads, uschia che la rait da bus daventa pli unifurma e pli survesaivla. Cun ils novs bus da cumplettaziun tranter Zuoz e San Murezzan pon las passagieras ed ils passagiers viagiar en il tact da mes'ura fin a Landquart. Quai garantescha ina colliaziun cumadaivla cun il traffic a gronda distanza.
Ulteriuras meglieraziuns en la rait da bus:
- Sin la lingia dal Lucmagn circuleschan a partir da la stagiun da stad, mez zercladur 2025, curs directs tranter Mustér e Biasca.
- Il Signuradi survegn in tact da quasi mes'ura sin la lingia d'auto da posta tranter Ragaz Bogn – Fläsch – Maiavilla – Landquart.
- Seewis Vitg survegn in tact d'ina ura.
Plinavant datti era novaziuns tecnicas. Sin intginas lingias da l'auto da posta èsi pussaivel da reservar curs sin dumonda directamain sur l'app da las Viafiers federalas.
Tegnair quint dals basegns
Questas mesiras voluminusas hajan la finamira d'augmentar la punctualitad e la stabilitad dal manaschi e da tegnair quint dals basegns da las viagiaturas e dals viagiaturs. Scriva il chantun en sia communicaziun. Ils novs uraris sajan in pass impurtant per promover ulteriuramain il Grischun sco destinaziun attractiva per ils giasts sco era per las pendularias ed ils pendularis.
Il nov urari stat a disposiziun sin la pagina d'internet da las Viafiers federalas sco er en l'app.
