Il cussegl da fundaziun da la fundaziun Provediment da sanadad Engiadin'Ota, curt SGO, ha decis unanimamain per la varianta d'integrar l'ospital da l'Engiadin'Ota en l'Ospital chantunal dal Grischun. Questa mesira duai segirar a lunga vista il provediment da sanadad en Engiadin'Ota ed en las regiuns cunfinantas. L'integraziun vegn sustegnida dal departament chantunal da giustia, segirezza e sanadad. La finamira è da meglierar la situaziun finanziala da l'ospital.
Quatter opziuns èn vegnidas examinadas. L'integraziun è vegnida identifitgada sco soluziun la pli effectiva. L'integraziun empermetta ina meglra efficienza, qualitad e digitalisaziun dals servetschs da sanadad.
Ina schelta na datti betg, perquai cha questa missiva che nus mettain avant a la populaziun è la meglra pussaivla che nus pudain far en questa situaziun.
Vischnancas stuessan contribuir pli pauc
Cun l'integraziun stuessan las vischnancas contribuir per onn 7 milliuns francs, partids tranter la cunvegna da prestaziun cun l'ospital chantunal a Cuira cun maximalmain 5,4 milliuns francs ed ina contribuziun dad 1,6 milliuns francs a la SGO per l'administraziun ed infrastructura da las immobiglias. Quai enstagl da 11,4 milliuns francs per la varianta da restar independents, sco ch'igl è vegnì communitgà vinavant. L'integraziun sco tala vegnia a custar 6 milliuns francs. La cunvegna da prestaziun tranter las duas partidas duai durar sis onns, dal cumenzament 2026 fin la fin dal 2031.
Las calculaziuns da la SGO sezza mussan atgnamain che sch'ins na collavura betg, fissan ils custs anc pli auts.
Plinavant duain tut las offertas medicinalas existentas vegnir manadas vinavant, dentant vegnan intginas plazzas da lavur orientadas da nov u stritgadas. Per resguardar la lescha da lavur e per ulteriuras spezialisaziuns vegnan creadas var 21 plazzas novas. Tut en tut duain cun questa fusiun però ir a perder 20 plazzas, quai surtut en il cader e l'administraziun, però cun paucas disditgas.
La fundaziun vegn ad exister vinavant e represchentar ils interess da las vischnancas. Ella vegn er a manar ils centers per persunas attempadas, spitex e posts da cussegliaziun.
Populaziun ha il davos pled
Il davos pled ha dentant la populaziun. Las votantas ed ils votants da las vischnancas decidan definitivamain davart l'integraziun la primavaira a l'urna. Occurrenzas d'infurmaziun publicas èn planisadas per il mars 2025.