Engaschi giuven - «The Great Eight» portan vent frestg a Domat

L'origin ha la gruppa èn dus circuls d'amis da las annadas 1995 e 2001, ch’èn sa mess ensemen. Perquai ch'i na deva nagin lieu da s'inscuntrar per ils giuvens han ils «vegls» dad els prendì a tschains in local en in tschaler da refugi – ch'els numnan «il Bunker» – per avair in lieu da star da cumpagnia. La gruppa dals amis giuvens haja alura copià questa idea ed uschia sajan els s'entupads adina pli savens. Entras quai saja naschida la gruppa dals «Great Eight». L'emprim hajan els gidà da differentas occurrenzas ed uschia survegnì in'invista davos las culissas e pudì emprender ina massa.

«The Great Eight plus Ladies»

Lur pli gronda atgna occurrenza – quasi lur «pop» – è la festa da stad, il «Viva Domat» ch'ha gì lieu per l'emprima giada l'avust 2023. Els hajan vulì far insatge ch'i n'ha en questa furma anc mai dà a Domat. Organisar occurrenzas e s'engaschar per la cultura da Domat è daventà ina passiun. Entant èn ils «Great Eight» betg pli mo en otg, mabain en dudesch – quai grazia a las soras da dus commembers e las amias dals commembers. Ellas avevan dentant gia da la bell’entschatta gidà davos las culissas. Els èn uss pia «The Great Eight plus Ladies». L'entira lavur per las occurrenzas fan els ed ellas sper in pensum da lavur u in studi da 100%. Fitg impurtant èsi che lur occurrenzas èn per grond e pitschen e ch'ils pretschs restan favuraivels, uschia ch'era persunas ch’èn anc en l'emprendissadi u en il studi pon prestar quellas.

Il tschaiver a Domat

Ensemen cun il comité d'organisaziun ed autras persunas engaschadas han ils «Great Eight» era gidà da spendrar la tradiziun lunga dal tschaiver a Domat. Suenter la pandemia na saja quella numnadamain betg stada sut bunas stailas. Pli baud sajan ins ids durant il tschaiver d'ustaria ad ustaria – pervia da corona haja ina gronda part da questas ustarias dentant stuì serrar las portas. L’emna da tschaiver a Domat na marschava betg pli propi. Suenter corona han ils «Great Eight» mess en pe ina tenda da festa sin la plazza da sentupada a Domat ed uschia gidà da spendrar la tradiziun.

Era las salamuiras da la sonda han tradiziun a Domat. Per glieud pli giuvna na sajan quellas dentant mai stadas propi attractivas, cunquai ch'insatgi che saja anc en l'emprendissadi u en il studi na possia betg exnum prestar in menu ed anc pajar las bavrondas per tadlar las salamuiras. Perquai ha la gruppa decidì d'era porscher salamuiras en ina tenda supplementara pli pitschna. Quai cun in menu pli simpel – uschia possian ins giudair las salamuiras en ina varianta favuraivla.

Avant che l’emna da tschaiver a Domat va liber è la gruppa en acziun per drizzar l'entira infrastructura – quai na saja betg adina simpel cun in pensum da lavur u studi cumplain. Magari saja quai ina sfida da pudair prender liber quels dis. Durant il tschaiver sajan las notgs plitost curtas.

Organisar occurrenzas è daventà ina passiun per els ed ellas, uschia ch'i na saja nagin problem d'ina giada avair in zic pli pauca sien. Bainprest suenter la finiziun da l'emna da tschaiver a Domat sa mettan els ed ellas perquai gist puspè vi da las preparativas per l'onn proxim.