Lung la paraid da protecziun cunter la canera sin l’autostrada A13 datiers da Favugn han cumenzà las lavurs per amplifitgar l'implant solar. L’entschatta da november 2024 haja cumenzà la montascha da la surconstrucziun, scriva la Rhiienergie sin dumonda. Per disturbar uschè pauc sco pussibel il traffic èn las lavurs vegnidas fatgas mintgamai la notg. Suenter totalmain sis notgs è la montascha gia stada a fin. Fin la primavaira 2025 vegnan montads totalmain 1'520 panels solars sin la nova sutconstrucziun.
Il nov implant furnescha tenor la Rhiienergie ina prestaziun totala da 675 kWp (kilowatt peak) ed in retgav d'electricitad prognostitgà da 775'000 kilowatt uras per onn. Cun quest quantum possian vegnir provedidas var 226 chasadas cun electricitad. Il nov implant per lung la A13 sper Favugn saja cun quai 2,5 giadas pli productiv che l'indriz existent. Quai saja in ulteriur pass impurtant e decisiv per in avegnir neutral areguard il CO2, scriva la Rhiienergie plinavant.
-
Bild 1 von 5Legenda: Gia dapi l'onn 1989 datti in'ovra solara tranter Favugn e Domat. RTR
-
Bild 2 von 5Legenda: Christian Capaul, il manader da fatschenta da la Rhiienergie. RTR
-
Bild 3 von 5Legenda: Qua è da vesair l'ovra existenta e la construcziun nua ch'ella vegn prolungada. RTR
-
Bild 4 von 5Legenda: La sutconstrucziun è gia fatga. RTR
-
Bild 5 von 5Legenda: L'ovra solara exista dapi l'onn 1989 – l'onn 2017 han ins midà ils moduls cun tals pli effizients. RTR
Or da l'archiv