L'interpresa d'electricitad grischuna Rhiienergie ha fatg l'onn passà in gudogn da concern da bunamain 840'000 francs. Quai vegnia da dapli gudogns da las spartas solar e rait.
En vista a las turbulenzas sin il martgà d'energia europeic l'onn avant hajan els però stuì augmentar ils pretschs per l'energia, uschia scriva la Rhiienergie en ina communicaziun. Ils pretschs sajan dentant fermamain reglamentads.
Persistenza
Cun la construcziun cun la rait da chalur a distanza a Tumein haja la Rhiienergie cumenzà cun in project impurtant per la persistenza. Ed er tar ils implants solars sper l'autostrada e cun la producziun d'idrogen a Domat veglia la Rhiienergie cuntinuar.
L'interpresa grischuna, che porscha era implants solars, ha era sentì l'auta dumonda suenter tals implants. Uschia saja era la producziun da l'atgna energia solara creschida marcantamain l'onn passà.
Il cussegl administrativ saja vegnì reelegì. Nov fa Marcel Bieler part sco represchentant da la vischnanca Panaduz. El remplazza Elita Florin-Caluori.
