L'interpresa Calandawind SA cun sedia a Cuira ha gia construì l'ovra da vent «Oldis I» a Haldenstein l'onn 2013. Quella generescha bun 4,5 uras gigawatt ad onn. Quai è avunda energia regenerabla per radund 1'300 chasadas.
Uss vul la Calandawind SA construir ina segunda roda da vent datiers da l'existenta – la «Oldis II». Las cundiziuns da vent sajan bunas là ed ils conflicts areguard la natira sajan mo pitschens en il territori Oldis, scriva la citad da Cuira. Plinavant saja l'acceptanza envers implants d'energia da vent a Haldenstein s'augmentada, dapi ch'ins haja installà l'emprima roda da vent il 2013. Quai mussa tenor la citad da Cuira in studi da l'universitad da Son Gagl. Grazia a novas tecnologias fiss la segunda roda da vent bunamain dubel uschè effizienta sco la «Oldis I». Cun 7,5 uras gigawatt ad onn producess ella schizunt avunda energia per 2'200 chasadas.
La citad da Cuira ha elavurà ina revisiun parziala da l'urden fundamental per pudair construir quella segunda roda da vent a Haldenstein, en il territori Oldis. La revisiun parziala ha il parlament approvà cun 16 encunter 4 vuschs. Las votantas ed ils votants da Cuira decidan ils 9 da favrer 2025 davart la fatschenta.
Ils adversaris argumenteschan lur aversiun cunter il project, che projects d'energia d'aua sajan pli effizients ni era ch'ina roda da vent ruinass la cuntrada. Plinavant han els la temma, che suenter ina segunda roda da vent vegnan pli tard lura anc dapli.
Ils aderents per il project din, ch'il lieu saja ord vista topografica ed energetica ideal per ina segunda roda da vent. L'argument ch'i duess lura anc dar dapli rodas da vent sajan be speculaziuns.
Or da l'archiv: