Di internaziunal d'autissem - In spectrum cun bleras fassettas

Disturbis dal spectrum d'autissem – curt DSA – èn disturbis cumplexs dal svilup neurologic che sa mussan en differentas furmas. Uschia po in disturbi dal spectrum d'autissem influenzar la vita dals pertutgads e las pertutgadas sin differentas modas. Persunas cun autissem percepeschan il mund savens auter, quai po manar a sfidas unicas, ma er a forzas spezialas.

In disturbi dal spectrum d'autissem è da naschientscha e po sa manifestar tar mintga indivi auter. Tratgs tipics èn:

• Difficultads en l'interacziun sociala e la communicaziun
• Cumportaments u interess limitads u repetitivs
• Sensibilitads: sin glisch, gusts, canera u palpar

Ma il medem mument pon persunas autisticas uschia avair forzas spezialas:

• Attenziun extraordinaria per detagls
• Abilitad da pudair sa focussar ferm sin champs d'interess
• Pensar logic ed analitic

Cunquai che autissem è in spectrum è il sustegn ch'ì basegna era differents – entant che tschertas persunas dovran sustegn intensiv en il mintgadi pon autras persunas pertutgadas era viver cumplettamain independent.

Diagnosa surtut tar dunnas ina sfida

Tut tenor furma vegnan ils emprims segns gia observads en l'uffanza, ma i dat era furmas ch'èn pli pauc evidentas e vegnan uschia pir diagnosticadas en la vegliadetgna. Tar dunnas vegnan disturbis dal spectrum autistic savens diagnostitgadas pir pli tard. Pli bauld pensavan blers e bleras anc che be u surtut be umens sajan perutgads d'autissem. Uschia consideravan ils simptoms ed ils criteris per la diagnostica surtut quels dals umens.

Las caracteristicas specificas tar dunnas èn dentant differentas. Novas perscrutaziuns mussan numnadamain che l'autissem po esser gist uschè frequent tar dunnas, ma i sa manifestescha savens sin in'autra moda. Dunnas cun autissem han sintoms pli subtils e pon «sa mascrar» meglier en situaziuns socialas. Savens datti tenor l'experta Maral Schlegel, era autistas ed autists che han sper esser sin il spectrum malsognas psichicas. Per ella saja impurtant che era quellas stettian en il focus e ch'i dettia agid. Per far diagnosas dovri in lung process cun tests ed observaziuns en differentas situaziuns dal mintgadi dals pertutgads e da las pertutgadas.

Autissem en il Grischun

Las cifras mundialas mussan che in zic dapli che 1% da la populaziun èn sin il spectrum. Quai possian ins transferir uschia per mintga terra, di l'experta Maral Schlegel. Ella è da l'avis ch'i vegnia fatg sforz en il chantun Grischun per sensibilisar e per porscher l'agid neccessari. Ma ella di era, ch'i duvrass anc dapli purschidas e surtut era dapli persunas dal fatg.

Or dal Cussegl grond hai dà il 2023 in'incumbensa ch'è vegnida surdada a la regenza. Per stgaffir in post spezialisà per persunas cun in disturbi sin il spectrum autistic e dad observar ina planisaziun per in center da cumpetenzas. Quai beneventa l'experta fitg, ella sezza era part dal process per stgaffir il post spezialisà.