Scienziadas, protecturs da la natira e represchentantas da l’agricultura da la Germania, l’Austria e da la Svizra han la primavaira lantschà ina sort resoluziun, l'uschenumnada «Decleraziun da Maiavilla». Il gremi tema ch’adina dapli purs smettan da cultivar lur terren pervia dal luf ed els smanatschan ch’era bleras alps vegnan dadas si. E quai saja in grond problem per la biodiversitad.
Sch'adina dapli terrain agricul crescha en, van adina dapli spezias a perder.
Tut auter vesan ins quai tar il Parc Naziunal Svizzer. Dapi 100 onns s’occupan ils scienziads dal parc cun la dumonda tge che capita sche terrain na vegn betg pli cultivà da l’uman. Lur studis hajan mussà ch’il terrain che na vegn betg pli cultivà da l’uman sa midia.
I na dat betg pli paucas, ma autras spezias. E cun ils onns daventa la variaziun perfin pli gronda.
Tals studis na persvadan betg il comite ch'ha suttascrit la «Decleraziun da Maiavilla». Il gremi ha publitgà il mars ses catalog da pretensiuns:
- Il status da protecziun dal luf vegn sbassà.
- La populaziun da lufs actuala vegn reducida ad in pèr paucs trieps.
- I dat territoris da pastgira senza lufs ch'èn reservads per l’agricultura.
- Sche lufs n’èn betg spuretgs, vegnan els sajettads immediat.
Cun las pretensiuns vuless il gremi dar in stumpel a las discussiuns actualas. El vul che la Svizra, l’Austria e la Germania sclereschian ensemen, co precis ch’ins duai regular ils lufs e quants trieps ch'i cumporta en l’avegnir.
