Dapli trens en las regiuns - Suenter critica ha la Viafier retica per part adattà l'urari

Avant in mais aveva la viafier retica annunzià da stuair adattar intginas colliaziuns la damaun e la saira en las regiuns – vul dir remplazzar trens cun bus. Quai aveva procurà per blera critica or da las regiuns. Uss ha la retica decis da resguardar ina part dals giavischs, sco ella ha communitgà venderdi avant las medias.

Trens supplementars per pendularis en la regiun Tavau – Filisur

A partir dals 11 da mars datti dal glindesdi fin venderdi dus trens la damaun tranter Tavau e Filisur ed enavos:

• Partenza Tavau Platz: 06:05 e 07:31
• Partenta Filisur: 06:34 e 08:04

Trens supplementars enstagl da bus ad Arosa

Era sin la lingia d'Arosa è vegnì adattà il plan sco suandant:

• A partir dals 11 da mars: il venderdi saira van ils trens fin las 22:00 enstagl d'enfin las 21:00 e vegnan pir lura remplazzads da bus.
• A partir dals 11 da matg: la sonda saira datti en mintga direcziun duas colliaziuns da tren dapli che previs cun bus.

Trens directs da Landquart en direcziun Scuol-Tarasp

Sin questa lingia valan las midadas da stuair midar a Sagliains dals 11 da mars fin ils 13 da matg. A partir da lura datti en la direcziun Landquart-Scuol-Tarasp ina colliaziun directa cun il tren. En tschella direcziun resta dentant da stuair midar a Sagliains. La colliaziun directa da Landquart a Scuol-Tarasp munta che viagiaturas e viagiaturs midan da Puntraschigna a Scuol-Tarasp a Sagliains, perquai che viagiaturas e viagiaturs da Puntraschigna a Landquart han ina colliaziun directa senza midadas.

Memia paucs locomotivists e locomotivistas

Raschuns daco ch'ins haja stuì adattar l'urari, sajan la mancanza da locomotivistas e locomotivists, dapli midadas da persunal ch'en media, midadas internas sco er dapli e pli lungas absenzas pervia da malsognas, ha il directur da la viafier retica Renato Fasciati a l'entschatta da la conferenza da pressa anc ina giada declerà. E malgrà diversas mesiras sco dapli reclama per il persunal, dapli plazzas da furmaziun, persunal extern e la surpigliada da lavur entras autras gruppas da lavur, na saja betg reussì da meglierar la situaziun ed uschia hajan las locomotivistas e locomotivists stuì bajegiar si adina dapli sururas. Quai ch'haja sfurzà la viafier retica dad adattar l'urari.

Petiziun cunter las midadas è vegnida surdada a Filisur il venderdi

Cun l'annunzia da questa midada hai dà blera critica . A Filisur è il venderdi avantmezdi vegnì surdà ina petiziun che pretenda la colliaziun da tren tranter Filisur e Tavau. Lantschà questa petiziun aveva ina gruppa d'interess ed ha rimnà 1'100 suttascripziuns.

Il president da vischnanca da Bravugn Filisur, Luzi Schutz ch'ha fatg part da questa gruppa d'interess cunter las midadas da la Viafier retica è cuntent ch'ins ha pudì far il discurs, ch'ils dubis èn vegnids prendids serius e che la Viafier retica ha empruvà tut da chattar schliaziuns. Era sch'i n'è betg ì exact uschia sco giavischà.

Betg cuntenta è Birgit Ottmer, ina da las iniziantas da la gruppa d'interess. La pretensiun da la gruppa saja stada moderada, e tuttina haja la Retica be agiuntà dus trens la damaun, senza – sco pretendì – era duas colliaziuns la saira. I saja bain in pass en la dretga direcziun, dentant na tanschia quai betg, els vegnian a cumbatter vinavant, scriva la gruppa d'interess en ina communicaziun a las medias.