La societad Anna Florin n’ha betg las pussaivladads persunalas e finanzialas per organisar ina task force, uschia il suprastant Riet Fanzun. Els han ussa scrit ina segunda brev al chantun cun il giavisch d'organisar in inscunter per evaluar pussaivladads da tuttina furmar ina task force.
La regenza ha gia ina giada ditg Na
Ils 11 da schaner avevan la societad Anna Florin ed autras gruppas d’interess giavischà en ina charta da s’inscuntrar cun la regenza. L’intent era che lezza installeschia ina task force che coordineschia il cumbat cunter il problem structural da mancanza d’abitaziuns primaras.
Betg crear task force, ma collavurar
En sia resposta dal favrer scriva cusseglier guvernativ Marcus Caduff che la regenza na veglia betg sezza crear ina tala task force, ma saja gugent pronta da collavurar. Ina tala task force stoppia vegnir organisada sin livel communal u dad organisaziuns d’interess. Gugent prendia in represchentant dal chantun part ad ina sesida da kick-off d’ina tala task force.
Il chantun haja gia stgaffì la basa legala, per che las vischnancas possian crear spazi d’abitar per indigens. Mintga vischnanca haja auters basegns, uschia che soluziuns surregiunalas na portian nagut.
Passivitad nunchapibla
Anna Florin na chapescha betg, pertge che la regenza sa cuntegna uschè passivamain. L’organisaziun empermetta dentant da betg laschar luc en il cumbat cunter la mancanza d’abitaziuns primaras. Senza buna veglia da la regenza, vegnia il svilup actual ad avair consequenzas gravantas, uschia la societad en sia communicaziun suenter la resposta da la regenza.
