La lescha actuala da segundas abitaziuns na cuntenta betg. L'uniun Anna Florin ha perquai contactà las vischnancas da las Vals dal Sid e da l’Engiadina. Las reacziuns eran fitg diversas. Differentas vischnancas han infurmà sin dumonda da RTR da betg avair retschavì quai mail, autras na basegnan betg l’agid da l’uniun.
Zernez e Puntraschigna sco exempel
Las vischnancas da Zernez ed era da Puntraschigna han prendì cogniziun da las mesiras proponidas da l’uniun Anna Florin. Omaduas vischnancas avessan senz’auter ina tscherta necessità, ma mintgina ha auters problems da schliar.
Zernez è vidlonder da fusiunar las leschas da fabrica ed era vi da planisar il spazi d’abitadi per ils proxims 15 onns. Puntraschigna è gia dapi onns vi dad elavurar il tema, per els duain questas propostas da l’uniun esser in tschert agid per vesair sch’ins ha resguardà tut ils puncts.
Era cun il chantun
L’uniun Anna Florin ha infurmà da vulair sa drizzar era al chantun Grischun, cun la finamira da fundar ina sort task force che sa deditgescha als temas actuals areguard las segundas abitaziuns ed il spazi da viver persistent.
