Fertant che la solidaritad en Svizra haja patì durant la pandemia, possian ins uss constatar ina midada: la solidaritad saja generalmain gronda e las relaziuns tranter las persunas bler pli positiva ch’anc il 2021, scriva la Chadaina da Fortuna. La glieud saja pli amiaivla, pli pauc agressiva e plitost pronta da sa gidar e prender resguard d’insatgi. Era entras la guerra en l’Ucraina haja dà in’unda da solidaritad, quella saja – cun il temp – puspè tschessada.
Differenzas tranter regiuns linguisticas
Da princip sa mussia en la populaziun svizra ina solidaritad marcanta sur tut las generaziuns. Tar las dunnas saja la solidaritad in toc pli auta che tar ils umens. En la Svizra tudestga e franzosa muntia la solidaritad en emprima lingia da sa gidar entaifer la famiglia ed il vischins. En la Svizra taliana giaja per il sustegn d'umans en miseria.
Sco motiv principal per in agir solidaric vesia la populaziun svizra il duair e giavisch da la coesiun sociala, hai gì num vinavant. En la regiun linguistica taliana saja ina motivaziun individuala anc pli accentuada. Modestadad e discreziun vegnian consideradas sco impurtant en tuttas parts dal pajais.
Prontezza da far donaziuns
Tar la prontadad da far donaziuns per in bun intent hai medemamain dà differenzas tranter 2021 e 2023. Tenor il barometer da solidaritad ha quest onn in terz da las persunas dumandadas inditgà da ch'els fetschian donaziuns «a moda spontana». Avant dus onns eran quai anc 42%. Quest onn ha percunter in pau dapli ch’in quart inditgà da far donaziuns «regularmain», avant dus onns era quai in tschintgavel.
Il barometer da solidaritad che la Chadaina da Fortuna ha publitgà s basa sin ina retschertga da la SRG SSR. Passa 3'000 persunas èn sa participadas. Evaluà ils resultats ha il center da perscrutaziun Sotomo ed il Center for Philantrophy Studies da l'Universitad da Basilea.
