Il minister da medias Albert Rösti procura cun sia decisiun surprendenta per ina transfurmaziun da la cuntrada da medias en la Svizra Sidorientala. A prima vista è sia argumentaziun – il rinforzament da la diversitad d’opiniuns e da la purschida – chapibla. Er en vista als svilups actuals sin il sectur da medias svizzer cun centralisar e metter ensemen adina dapli redacziuns fa la decisiun da Rösti senn. Ma la realisaziun sveglia bleras dumondas.
Il dossier da Roger Schawinski, in um da medias versà cun vastas enconuschientschas en il sectur da radio, haja ademplì meglier ils criteris, uschia il Uffizi federal da communicaziun (Bakom). Tuttina: l’ambiziun da realisar in program da radio en trais linguas per ina regiun gronda cun mo var 20 collavuraturas e collavuraturs resta dubiusa.
Perdenta è la gruppa da medias Somedia che perda radund 3 milliuns francs entradas. Ella sto sa laschar reproschar d'avair fatg memia pauc per ademplir la concessiun. Uschia è vegnida crititgada pliras giadas la mancanza da rapports or da tschertas regiuns da concessiun. Er sche la Somedia ha la speranza che tut resta sco enfin qua ils proxim onns - entras proceduras giudizialas – vegn il squitsch economic pli grond. Cunquai crescha era la malsegirtad tar il persunal e tar il public.
E gist il public en ina regiun periferica sco il Grischun dovran in ferm schurnalissem regiunal.
Flavio Bundi
schefredactur RTR
