En il territori da Bienna survegn Canal Alpha cun sedia a Cortaillod NE cun il num Canal B da nov la concessiun da televisiun regiunala. Enfin ussa possedeva la Telebielingue da la chasa editura Groupe Gassmann quella concessiun. Tenor indicaziuns da pli baud vul Canal B producir in program biling. En il territori da l'artg dal Giura maina Canal Alpha gia in emettur da televisiun.
A Genevra retschaiva Radio Vostok da nov la concessiun, Radio Cité perda ella. Il directur dal Bakom Bernard Maissen ha constatà ch’il dossier da Radio Vostok haja cuntegnì per exempel «ina chapientscha pli vasta da la cumplementaritad».
Purschiders ch'han pers dastgan cuntinuar, na survegnan dentant nagins daners pli
Ils purschiders che perdan la concessiun pon bain cuntinuar, na survegnan dentant nagins daners pli da la Confederaziun. En blers cas è quai privlus per l'existenza. Cunter las decisiuns dal Bakom po vegnir fatg recurs entaifer 30 dis tar il Tribunal administrativ federal. Sche quel na decida betg definitiv fin la fin dal 2024, dat la Confederaziun concessiuns provisoricas.
Bakom ha concedì en tut 38 concessiuns
L'Uffizi federal da communicaziun (Bakom) ha concedì gievgia en total 38 concessiuns per radios locals e televisiuns regiunalas, quai per la perioda 2025 fin 2034. En tut èn 51 emetturs s'annunziads per las concessiuns. En 11 territoris avevi dà concurrenza.
Il directur dal Bakom, Bernard Maissen, ha discurrì a Berna davant las medias d’in «dumber impressiunant da las persunas che han candidà». Quai mussia ch’il servetsch public regiunal funcziunia. Tuttas annunzias hajan ademplì ils criteris da qualitad.
