E tuttina las scolas grischunas èn vinavant dependentas da scolastas e scolasts cun lubientschas spezialas. Quai perquai che mo radund 80% da las persunas d'instrucziun han in diplom renconuschì per il stgalim ch'el u ella ha fatg il studi. Per l'onn da scola 24/25 ha il chantun dà ora 530 da quellas lubientschas spezialas per la scola populara. Quai èn 12% dapli ch'avant in onn. La gronda part da las scolastas e dals scolasts cun lubientscha speziala ha bain in diplom d'instrucziun – els u ellas instrueschan dentant sin in auter stgalim.
Per exempel lavura ina scolasta primara sco scolasta secundara u in scolast primar sco pedagog curativ. Mintga 7avla lubientscha speziala va ad ina persuna d'instrucziun ch'è anc en scolaziun. Insuma nagin diplom scolastic han mo fitg paucas persunas d'instrucziun – numnadamain 1,5%. Per exempel instruescha lura in scrinari lecziuns cun lavurs manualas u in translatur ch'instruescha linguas. Il pensum da questas persunas dal fatg munta a 17 plazzas a temp cumplain. Tenor il chantun è quai in segn positiv che mussa ch'il Grischun possi garantir la qualitad en sias scolas.
Bleras scolastas e scolasts cun pensum pitschen
Il pensum da lavur d'ina scolasta u scolast cun permissiun d'instruir importa en media a 11,6 lecziuns, quai che correspunda ad in grad d'occupaziun da var 40% – in zic pli bass che l'onn avant. 43% da las permissiuns pertutgan pensums pitschens cun damain che 11 lecziuns. In tschintgavel da tut las permissiuns d'instruir vegnan dadas per pensums da tschintg lecziuns u damain. Totalmain lavuran var 75% da las scolastas e scolasts cun ina permissiun d'instruir en in pensum parzial.
