Sco la regenza grischuna communitgescha, saja legraivel ch’il dumber da tschiervs saja sa reducì cleramain en pliras regiuns cun problems pervi dals donns da guaud. Per exempel en la Surselva, en il Grischun Central, ed en las regiuns da tschiervs da la Muntogna e da Partenza Dadora.
Era sch’il plan da sajettar tschiervs è quest onn pli bass, cumpareglià cun ils onns avant – pretendia quel in grond engaschi da las chatschadras e dals chatschaders, scriva la regenza. E cunzunt impurtant saja ch’era la chatscha sin las chauras-chavriel ed ils chamutschs saja intensiva.
Dapli stambutgs e portgs selvadis
Creschidas èn percunter las populaziuns da capricorns respectiv stambutgs. En tut il Grischun datti il mument tenor las dumbraziuns 7’245 capricorns. Quai è la pli auta cifra dapi ch'il stambutg è vegnì recolonisà avant passa 100 onns.
Ed in cler augment datti era tar ils portgs selvadis en la Mesolcina Sut. Perquai che quels pon far gronds donns sin prads e curtins saja tant pli impurtant che la populaziun vegnia regulada, scriva il chantun.
La regenza grischuna ha entant approvà las prescripziuns da chatscha ed il plan da prelevaziun 2024.
