Ils chatschaders e las chatschadras ston savair a l'emprima egliada, nua ch'in animal selvadi sto vegnir tutgà per ch'il sajet saja mortal immediatamain. A medem temp na duai la charn da selvaschina betg vegnir contaminada. Tut tenor situaziun po quai esser difficil. Per render visibla questa problematica e per sensibilisar ils chatschaders, ha l'Uffizi da chatscha e pestga ensemen cun l'Uffizi per la segirezza da victualias e per la sanadad d'animals sco er ensemen cun l'Uniun grischuna da chatschaders da patenta elavurà in trenader online interactiv.
Avant che las chatschadras ed ils chatschaders grischuns vegnan confruntads cun la situaziun da sajettar in animal selvadi, absolvan els ina scolaziun detagliada. Ultra d'exercitar cun la buis en il stan da tir consista questa scolaziun dal studi da cudeschs e da la frequentaziun da lecziuns da teoria. In'ulteriura part impurtanta da la scolaziun èn ils curs LARGO, en ils quals stattan a disposiziun corps d'animals selvadis sco material illustrativ.
Fin ussa n'eri betg pussaivel da contemplar e d'examinar il corp d'in animal selvadi e ses singuls organs en il mintgadi. Tras in trenader online ch'è vegnì elavurà da nov, daventa quai ussa pussaivel per las chatschadras ed ils chatschaders. Il trenader online interactiv cumplettescha il catalog dals agids d'emprender e dat sustegn en la scolaziun.
Models traidimensiunals
L'interacziun cun models traidimensiunals da differents animals selvadis duai permetter als utilisaders d'emprender d'enconuscher l'anatomia interna dals animals. Per quest intent è il trenader online interactiv structurà en ils trais secturs:
- anatomia dals animals selvadis,
- simulaziun da tir,
- igiena da la charn da selvaschina
L'emprima part permetta da s'infurmar davart ils organs dals animals selvadis e da mussar e da zuppentar quests organs. Ils models traidimensiunals dals animals pon vegnir vulvids en tut las direcziuns ed ils differents secturs dals animals pon vegnir engrondids. En in segund sectur po vegnir simulà il sajet sin in animal. Qua vesan ins, tge organs che vegnissan culpids e tge effect che quai pudess avair per l'animal. En il terz sectur datti infurmaziuns e fotografias davart l'igiena da la charn da selvaschina. I vegn declerà, co che las chatschadras ed ils chatschaders duain proceder, tut tenor co ch'in animal è vegnì culpì.
La responsabladad resta tar las chatschadras ed ils chatschaders
L'applicaziun web sa drizzia en emprima lingia a chatschadras e chatschaders che vulan amplifitgar u rinfrestgar lur enconuschientschas, scriva il chantun vinavant. Gist sch'ellas ed els n'han anc betg gronda experientscha da chatscha, po la simulaziun esser in sustegn.
