4'909 tschiervs han chatschaders e chatschadras sajettà durant la chatscha 2023. Sut il stritg èn quai 369 pli pauc che l'Uffizi da chatscha e pestga aveva previs en ses plan da reducziun.
Er sche nus na cuntanschain betg dal tut il plan da sajettar, pudain nus ir da quai anora che nus cuntanschain la finamira da regulaziun e reducziun. Quai sa mussa però la primavaira.
Dapi plirs onns en roda saja il plan da reducziun stà ambizius, tge che saja er ina raschun daco ch'il plan da sajettar tschiervs è quest onn be vegnì cuntanschì per 93%, declera Lukas Walser, manader da la partiziun selvaschina e chatscha tar l'Uffizi da chatscha e pestga. Cunquai ch'ins saja dapi plirs onns en ina fasa da reducziun ed i dettia cunquai er ina chatscha intensiva, emprendian ils tschiervs da guntgir al squitsch da chatscha, uschia Lukas Walser. Per l'autra haja er l'aura in'influenza sin il success da chatscha, accentuescha el vinavant.
Sfida cunzunt en Grischun Central
Il mument saja cunzunt grev da cuntanscher en il Grischun Central las cifras dal plan da reducziun. Dasper l'aura e las navadas entschatta december engrevgeschia la gronda preschientscha dal luf en la regiun la chatscha. Tenor Lukas Walser saja grev da giuditgar tge influenza ch'il luf haja direct sin il dumber da populaziun da tschiervs e tge influenza ch'il luf haja sin il cumportament da la selvaschina.
Consequenzas per il guaud sch'i ha blers tschiervs
Blers tschiervs muntan era blers donns en il guaud. Quai mussa l'exempel dal guaud da protecziun sur Latsch al Culm da Latsch. Oravant tut las plantinas giuvnas pateschan e vegnan magliadas da la selvaschina. Per Urs Fliri, manader revier forestal, èsi impurtant da proteger uschè bain sco pussaivel las plantinas. Quai funcziuna be cun saivs – dentant è quai ina mesira be per singuls tocs dal guaud. I n'è betg pussaivel da proteger l'entir territori uschia. Uschia vegnan protegids las regiuns nua ch'igl ha foras en il guaud, per che quellas pon almain sa serrar.
