In bun tun, l'animal per terra, il plaschair grond. E suenter in viva e demussar l’ultima onur a la bestga segua per il chatschader u la chatschadra la birocrazia obligatorica. Purtar en la preda en la glista da butin. Uschia l’andamaint fin ussa durant la chatscha ed uschia resta quai er en l’avegnir. Ma co ch’ils chatschaders e las chatschadras vegnan a manar quella glista, vegn bainbaud a sa midar. Ina app duess remplazzar la glista da butin sin palpiri. Tut las datas ch’ins stueva fin ussa scriver en e per part anc ina giada inditgar durant la controlla, pon ins far a moda digitala, svelt ed intuitiv. E suenter ch’ins ha ioltrà il butin, arrivan las datas, subit cura ch’ins ha colliaziun cun cun la rait, en il sistem da l’uffizi e tar il guardiaselvaschina.
Avantags per chatschaders e per l’uffizi da chatscha
Ils guardiaselvaschina lavuran gia dapi in pèr onns cun meds digitals per registrar tut ils animals ch’els controllan durant la chatscha. Avant in onn hajan ins lura sviluppà ina applicaziun per ils chatschaders e testà quella cun var 30 participants. Suenter ils emprims feedbacks han ins surlavurà l’applicaziun e schlargià ils tests, cun dar a tut ils chatschaders e chatschadras da capricorns la pussibilitad da testar ella, sin basa facultativa.
Per ils chatschaders e las chatschadras vul quai dir en l'vegnir ch’els na ston betg pli sa mudregiar enturn cun culli e palpiri da tuttas auras ed els na ston era betg pli pensar londervi da trametter enavos la glista cura che la catscha è passada. Per ils guardiaselvaschina e l’uffizi gida la digitalisaziun tar lur lavur da controlla e da tegnair statistica.
Radund 80, vul dir bunamain in quart dals chatschaders e las chatschadras han demussà interess per testar la nova app. Tenor l’Uffizi da chatscha e pestga èn ils resuns enfin ussa mo positivs. Uss vegn evaluà tut ils tests e sche necessari anc fatg ulteriuras adattaziuns vi da l’app. E sche pussaivel vegn quella introducida gia proxim onn per tut quels e quellas che vulan.
