La mazlaria Schmed a Breil è ina da las mazlarias che prenda encunter animals sajettads da la chatscha grischuna. Mintga animal vegn valità tenor criteris e la qualitad da la charn. La veterinaria fa la controlla da la charn e decida, sche tscherta charn è contaminada. Quai munta per exempel ch'ella po esser donnegiada, ubain tschufragnada tras blessuras da la beglia u era dal magun. Lura sto quella charn vegnir allontanada. Per il mazler Venanzi Schmed èsi in grond avantatg da pudair laschar surpigliar la veterinaria questa decisiun.
En sia mazlaria venda el sulet charn da la chatscha grischuna. «Charn da selvaschina n'han ins mai avunda. Quai n'è mai in problem d'avair memia blera», di Venanzi Schmed. La charn è dumandada, savens era d'osps da vacanzas.
Per la gastronomia na vai strusch senza charn importada
Era il hotelier Christian Patscheider da l'hotel Baer & Post a Zernez cumprass gugent dapli charn da selvaschina indigena. Quai na saja dentant betg pussaivel. La dumonda saja in toc pli gronda che la purschida ed uschia cumpria el era charn importada da l'Austria ubain da la Germania. Cun la charn da selvaschina dal Grischun pudessia el forsa cuschinar e servir ils giasts durant dus dis – la stagiun per mangiar selvadi duria dentant in mais e mez.
