Grazia a las bunas cundiziuns da chatscha ed al grond engaschament èn las chatschadras ed ils chatschaders grischuns vegnids datiers da la quota dumandada gia durant la chatscha auta. Cun 1'955 tschiervs e cun 148 chavriels è il plan da la chatscha speziala stà l'onn 2024 pli bass ch'en ils onns precedents.
Buna lavur malgrà cundiziuns difficilas
Vers la fin da november ha il cumenzament da l'enviern procurà per naiv fin giu en la val. Pervia da las pitschnas quantitads da naiv èn ils tschiervs dentant restads ditg en ils quartiers da stad. Fin il december han ils animals tardivà da sa render en ils funs da las vals, nua ch'igl era pussaivel bain d'ir a chatscha. Concentraziuns pli grondas da tschiervs en quartiers d'enviern optimals n'hai betg dà. Quai ha difficultà en blers lieus d'ademplir ils plans da prelevaziun.
Las chatschadras ed ils chatschaders han prestà ina fitg buna lavur malgrà cundiziuns difficilas ed èn ids a la chatscha speziala en la gronda part da las regiuns durant 10 dis da chatscha.
Tar ils tschiervs è la preda da la chatscha speziala cun 1'200 animals quasi tuttina gronda sco l'onn precedent 2023. Tut en tut han las chatschadras ed ils chatschaders sajettà durant la chatscha speziala 91 chavriels, 1 chamutsch e 7 portgs selvadis. La chatscha da selvaschina d'ungla è ida a fin ils 18 da december 2024 cun l'ultim di da la chatscha speziala.
Cuntanschì 98% da la finamira tar ils tschiervs
Cun in resultat total da 4'877 tschiervs èn ils plans da prelevaziun da tschiervs vegnids ademplids per 98% e quels da chavriels cun 2'619 animals per 97%. Tar il tschierv è la cifra da prelevaziun dals animals feminins decisiva per la regulaziun. Cun 2'280 animals feminins è il plan qualitativ vegnì ademplì per stgars 80%. En territoris, nua ch'igl era necessari e raschunaivel, ha la surveglianza da chatscha anc sajettà singuls animals.
La reducziun da la populaziun da tschiervs è pretensiusa
Perquai che la populaziun da tschiervs era memia gronda en bleras regiuns dal chantun, èn vegnidas definidas populaziuns regiunalas ch'ins vul cuntanscher sin basa da la strategia da la Regenza «Spazi da viver guaud-selvaschina 2021». La primavaira 2024 importava la populaziun chantunala 14'225 tschiervs. Quai correspunda ad ina reducziun da passa 2'000 animals dapi l'onn 2020. En tschertas regiuns era gia cuntanschida la populaziun ch'ins vuleva avair, e l'incumbensa da la chatscha è stada quella da stabilisar questa populaziun.
En differentas autras regiuns sco il Partenz, la Val dal Rain Grischuna u la regiun Term Bel ha l'effectiv da tschiervs dentant stuì vegnir reducì anc ulteriuramain. Cun 4'877 tschiervs è vegnida prelevada ina quota da 34% da la populaziun da primavaira 2024. «Quai è in fitg bun resultat final», di Lukas Walser, manader da la partiziun selvaschina e chatscha tar l'Uffizi da chatscha e pestga.
