«Power» e «Puura» – cun questa cumbinaziun d'economia (Power) e l'agricultura (Puura) vul la PPS cuntanscher sia finamira principala da restar la pli ferma partida dal chantun. Il 2019 aveva la partida fatg stgars 30% da tuttas vuschs en il Grischun. In ferm resultat, manegia il president da partida Roman Hug, pertschert ch'i pudess vegnir grev da repeter questas cifras. E malgrà che la PPS era vegnida cleramain la pli ferma partida avant quatter onns – aveva ella pers in sez a la sanestra, numnadamain il sez da Heinz Brand.
Finamira è cleramain da restar la pli ferma partida.
Tant pli surprendent èsi ch'ins n'ha strusch sentì durant la preschentaziun da las duas glistas las ambiziuns da reconquistar quest segund sez. Finamira principala saja da restar la pli ferma partida dal chantun – natiralmain sper la reelecziun da Magdalena Martullo – il rest vesian ins alura l'october.
Economia ed agricultura / Martullo e Roffler
La PPS Grischun metta si duas glistas cun in focus sin economia ed agricultura. Sisum la glista 1 è sco spetgà la cussegliera naziunala en uffizi Magdalena Martullo-Blocher.
La segunda glista è ina glista exclusivamain da purs e puras. Sin plaz in da questa glista è il president da l'uniun purila grischuna Thomas Roffler.
PPS ha anc schlargià sias glistas
Las delegadas ed ils delegads da la PPS han nominà las duas glistas a chaschun da lur radunanza da nominaziun, scriva la Partida populara grischuna. Ils 18 d'avrigl ha la partida preschentà in terza glista cun candidats da l'Engiadin'Ota. Latiers vegn anc la glista da la Giuvna PPS Grischun.
| Glista 1 «Power» | Glista 2 «Puura» | Glista 3 «Gipfelstürmer» | Glista Giuvna PPS Grischun |
| Magdalena Martullo-Blocher, Meilen | Thomas Roffler, Grüsch | Stefan Metzger. Zuoz | Gieri Flurin Darms, Glion |
| Sandra Adank, Cuira | Walter Grass, Urmein | Gian Marco Tomaschett, San Murezzan | Sky Gansner, Favugn |
| Gabriela Menghini-Inauen, Poschiavo | Gabriella Binkert Becchetti, Val Müstair | Samuel Schäfli, Bever | Mila Luzi, Scheid |
| Roman Hug, Trimmis | Benjamin Hefti, Zizers | Christian Florin, Zuoz | Lars Bossi, Trimmis |
| Ronny Krättli, Domat | Martin Sgier, Lumbrein | Mario Salis, San Murezzan | Céline Cavelt, Cuira |
Sche la partida populara trametta insatgi en cursa per in sez en il Cussegl dals chantuns è anc avert.
