La PS Grischun ha nominà sonda las candidatas ed ils candidats per las elecziuns naziunalas l'atun. Per ils tschintg plazs sin la glista èn sa mess a disposiziun sis persunas. En in'elecziun è vegnì tschernì il tschintgavel plaz da glista tranter ils deputads Lukas Bardill e Tobias Rettich. Elegì è vegnì Rettich.
| Glista PS | Juso glista 1 | Juso glista 2 |
| Jon Pult, Cuira | Anna Bleuler, Masagn | Ioanna Bachmann, Braggio |
| Franziska Preisig, Samedan | Andrin Bluvol, Tavau | Maurus Müller, Domat |
| Renate Rutishauser, Tumegl | Naomi Deplazes, Cuira | Rosalina Müller, Favugn |
| Michal Hohl, Surselva | Mattia Pianta, Campocologno | Giulio Spano, Cuira |
| Tobias Rettich, Vaz Sut | Pascal Pajic, Cuira | Lukas Bleuler, Masagn |
Per l'emprim plaz metta la partida si Jon Pult e sin il segund plaz Franziska Preisig.
Medema tactica sco avant quatter onns
La finamira dals socialdemocrats saja da defender omadus sezs a Berna, ha il president da la partida grischuna, Andri Perl, ditg envers RTR. Pia quel da Jon Pult, sco er quel da Sandra Locher Benguerel che na candidescha betg per in'ulteriura perioda d'uffizi.
Il recept da success duess esser il medem sco avant quatter onns. Ina ferma glista duess purtar il success a la PS. Els hajan bain ponderà dad ir en la cursa cun duas glistas, ma els veglian fidar a la tactica che haja gia funcziunà avant quatter onns, declera Andri Perl. Funcziunar da defender omadus sezs, duessia era grazia ad ina colliaziun da glistas cun l'allianza dal clima. Cun ils Verds guardi ora bain e cun ils Verdliberals sajan els anc en discussiun, ha il president da partida ditg.
Sche la Partida socialdemocratica trametta insatgi en la cursa per in sez en il Cussegl dals chantuns è anc avert.
