Candidaturas grischunas - PLD va cun Giacometti e Schmid – Rathgeb porta mo aua

Ils liberaldemocrats sa preparan sin in cumbat dir per ils tschintg sezs en il Parlament federal, uschia il candidat e manader dal cumbat electoral Christof Kuoni. Experiments fa la partida perquai nagins: Sco candidata principala è vegnida nominada, sin plaz in e dus da la glista principala, la cussegliera naziunala Anna Giacometti.

Ella duai salvar il sez ch'ils liberaldemocrats han reconquistà il 2019. Salvar ses sez duai er il cusseglier dals chantuns Martin Schmid, el candidescha per ina quarta perioda d'uffizi.

Rathgeb porta aua

Christian Rathgeb conferma sin dumonda ch'el giaja cumplainamain d'accord cun la strategia da la partida da metter el mo sin plaz trais. Sia finamira saja da sustegnair Anna Giacometti per ch'ella possia salvar il sez liberaldemocratic en il Cussegl naziunal. El punctuescha dentant er ch'el saja anc giuven e ch'el n'haja betg anc terminà sia carriera politica. I saja senz'auter pussaivel che ses num saja en quatter onns puspè da leger sin ina glista per il Cussegl naziunal.

Er il president da la partida Bruno Claus di che la finamira è cleramain ch'Anna Giacometti possia salvar ses sez. Ma er el di che la partida haja schon anc plans per Christian Rathgeb en quatter onns tar las proximas elecziuns naziunalas. Tge plans che quai è da sia vart na vuleva el dentant betg tradir. Er puncto pussaivlas colliaziuns da glistas cun autras partidas na vuleva Bruno Claus anc betg dir insatge, mo ch'ins saja actualmain en discurs cun differentas partidas. Avant quatter onns era la PLD sa colliada cun PBD e PCD ch'èn oz l'Allianza dal Center.