Savens «manchian la savida u las infurmaziuns» en connex cun la sanadad psichica, scriva il chantun. Perquai lantscha il chantun gia la sisavla giada ils «dis d'acziun per la sanadad psichica». En il rom da quests dis datti en l'entir chantun lecturas, films e discussiuns.
Il chantun scriva en sia communicaziun ch'i saja «central da savair, co ch'ins possia rinforzar resursas per la psica ed identifitgar baud grevezzas psichicas.» I dettia numnadamain era forzas da resistenza, quai na saja dentant savens betg enconuschent. Las occurrenzas han tranter auter lieu a Scuol, Sta. Maria en Val Müstair, Glion, Mustér, Domat, Samedan e La Punt Chamues-ch. Ils dis d'acziun cuzzan dals 7 da settember enfin ils 10 d'october.
La glieud giuvna è specialmain pertutgada
Che quai saja necessari, mussia er il fatg ch'il squitsch psichic saja creschì ils ultims onns per blers. Spezialmain pertutgads èn tenor il chantun giuvenils tranter 15 e 24 onns. Aregurard las cifras menziunescha il minister da sanadad Peter Peyer il fatg che – vis sur l'entira Svizra – fin in terz da la populaziun pateschia durant in onn da problems psichics. Il psicholog d'uffants e giuvenils, Georges Steffen aschunta che cunzunt las mattas sajan plitost perfecziunistas, gist er en scola. Ma l'entira generaziun giuvna pateschia adina pli savens da grevezzas psichicas.
In factur che po tenor Georges Steffen avair in'influenza negativa sin la psica dals giuvenils èn per exempel las novitads negativas da tut il mund, pia da guerras ed auters conflicts. Sco auter factur pussaivel numna el las medias socialas. Questas preschentian in purtret dal corp e da la vita che na correspundia betg a la realitad, creeschia dentant squitsch tar las persunas giuvnas.
Or da l'archiv
