Far il liken, sharen, posten – Social media è in'impurtanta part da la vita da la giuventetgna. Circa 89% dals giuvenils tranter 14 e 19 onns dovran social media mintga di u pliras giadas per emna, quai mussa il nov studi «James» da la Scol'auta turitgaisa per scienzas applitgadas (ZHAW).
Il medem mument cumbatta pli e pli blera glieud giuvna, oravant tut las giuvnas, cun problems psichics. Er en il Grischun. Actualmain vegn bajegià a Cuira ina nova clinica per uffants e giuvenils perquai ch'adina daplirs dovran sustegn psicologic.
Cun uschè bler temp passentà sin las medias socialas pon ins sa dumandar: ha il consum da social media in'influenza negativa sin la psica dals giuvenils? Plirs studis vesan in connex causal tranter tschertas malsognas da la psica e social media.
Giavisch da perfecziun privlus
Tenor in studi è in aspect privlus da social media ils ideals irrealistics. Tut para perfetg – bleras persunas mussan savens ina vita perfetga, èn constantamain ventiraivlas ed han savens in corp senza macla.
Spezialmain per glieud giuvna èsi natiral da sa cumparegliar. Pervia da social media èsi dentant pussaivel che giuvens e giuvnas sa cumpareglian cun persunas che na represchentan betg la norma.
Periclitadas èn qua oravant tut las giuvnas. Nov da diesch giuvnas n'èn tenor il studi «James» betg cuntentas cun lur corp. In nov studi da l'Engalterra mussa che social media po promover disturbis da mangiar (per exempel anorexia). Era disturbis da la percepziun da l'agen corp (dismorfofobia) èn pussaivlas tenor quest studi.
Ma er ils giuvens èn per part pertutgads d'ideals betg realistics. Els pon per exempel daventar obsessivs cun vulair adina pli e pli grondas musclas, ch'èn dentant mai avunda gronas per l'atgna percepziun (dismorfofobia da musclas).
Sch'il corp d'in sportist professiunal sco Cristiano Ronaldo – cun mo circa 7% grass – vala tuttenina sco normal, sa mida la percepziun da l'agen corp. Tuttenina na vala lez betg pli uschè bler.
Quant è real, quant illusiun?
Sin l'emprima egliada paran pia tuttas e tuts perfects sin social media. Ma quant pon ins vairamain crair a quai ch’ins vesa? Cun filters, photoshop ed er apps sco facetune – che manipuleschan fatschas e corps – èsi anc pli grev da distinguer tge ch'è real e tge illusiun.
David Preisig crai che la glieud giuvna è per part pertscherta che betg tut è real sin social media. Tuttina saja anc difficil per tscherts e tschertas da propi analisar e ponderar tge lavur, producziun ed inscenaziun che sa zuppa davos ina tala fotografia.
L'algoritmus ha ina gronda influenza
«Sch'ina persuna giuvna ha gia tscherts sintoms d'ina malsogna psichica, èsi pussaivel che quels sintoms vegnan rinforzads da social media». Quai pervi da l'algoritmus: Tiktok, Insta e co. mussan adina dapli cuntegn ch'interessescha u plascha a la persuna. Sch'ella consumescha cuntegns negativs e problematics, vegnan mussads adina dapli da lezs - ina spirala negativa pia. David Preisig, spezialist per cumpetenza da medias, vesa quai sco pli grond ristg da social media.
A Florida vulan ins perfin scumandar a persunas sut 16 onns da pudair consumar social media. L'algoritmus d'apps sco Facebook, Instagram e co. saja creà uschia che glieud giuvna passentia adina dapli temp sin social media – fin quatter uras a di en il cas da scolars e scolaras da New York.
Impurtant è co ins drova las medias socialas
Chapir co las medias socialas funcziunan e co duvrar ellas n'è tenor David Preisig nagin problem – quai saja «second nature» per ils giuvenils ch'èn creschids si cun ils smart phones. Impurtant saja dentant da tematisar e reflectar cun els ses consum da social media – e quai sin ina moda averta e betg valitanta.
Vegnir creschì n'è betg daventà pli simpel. Tenor mes manegiar è la cumpetenza da medias er ina part da quai vegnir creschì ozendi.
«Jeu sent'adina puspè ch'ils giuvenils schazegian da savair discurrer sur da sias experientscha cun social media senza la correctura dals creschìs.» Tge consequenzas che social media ha sin la psica dals giuvenils na vegn pia betg mo decidì dal temp che vegn passentà sin las apps, ma er dals cuntegns che vegnan consumads.
Betg tut è nausch: las schanzas da social media
Differents scienziads recumondan da tuttina betg pretender che tut quai ch'ha da far cun social media saja mo nausch. Sper ils privels dettia era plirs aspects positivs. Per exempel sustegn emotional en «online communities» cun glieud ch'èn en sumegliantas situaziuns.
Da quella opiniun è er David Preisig. Sco aspect positiv numna el la pussaivladad d'esser en contact cun autra glieud e da pudair communitgar pli simpel – e quai cun persunas sin l'entir mund. Sin las medias socialas datti er cuntegn che promova activ l'acceptanza, l'individualitad e diversitad.
