La citad da Cuira quinta cun expensas da 311,5 milliuns francs ed entradas da 316,3 milliuns francs. Per l’emprima giada surpassan expensas ed entradas ils 300 milliuns francs. Quai scriva la citad en ina communicaziun. Il motiv perquai sajan surtut la chareschia ed pli auts custs per sanadad e vegliadetgna. L'onn passà ha la citad da Cuira fatg in gudogn da 12 milliuns francs.
Investiziuns da 51,7 milliuns francs
Er l’onn che vegn quinta Cuira dad investir. En il budget sajan prevesidas investiziuns da netto da 51,7 milliuns francs. 16,5 da quels vegnan duvrads per la chasa da scola Fortuna. Il schlargiament da la staziun «Cuira Vest» vegn a custar l’onn 2025 4,2 milliuns francs.
Da tut las investiziuns possian ins finanziar 32,6% ord agens meds. I restian anc 35 milliuns francs che ston vegnir finanziads sin autra via.
Suprastanza vul sbassar quota d'agen capital
En futur vegnia adina pli difficil da pudair finanziar las investiziuns e da mantegnair ina quota d'agen capital da 60%. In pachet da spargn ha il Parlament da Cuira refusà. Ed a partir dal 2026 vegnan ins custs a s'augmentar vinavant, uschia la suprastanza.
Per surmuntar quellas sfidas finanzialas e per pudair investir vinavant en ils projects planisads, vul la suprastanza sbassar la quota d'agen capital da 60 sin 55%. Il parlament tracta quella dumonda ensemen cun il budget.
Adattà al tema
