La citad da Cuira ha fatg l'onn passà in gudogn in toc pli aut che budgetà. Cun in plus da 12 milliuns francs è quel per passa 11 milliuns sur quai che la citad aveva budgetà. Quai tar expensas da prest 282 milliuns francs. La raschun per quest surpli saja surtut d'attribuir a las entradas da taglia pli autas dentant era a custs pli bass. Quai ha declerà il president da la citad da Cuira Urs Marti avant las medias.
Las investiziuns èn cun 60,8 milliuns francs stadas per 21% sut quellas che la citad aveva budgetà. Quai surtut perquai che pliras investiziuns grondas han retard. Las bleras investiziuns èn prescrittas en il plan strategic da plirs onns.
Dapi il 2015 è l'agen chapital da la citad da Cuira creschì per 178 milliuns francs sin total 669 milliuns.
Gist cun quai che tut è vegnì pli char l'onn passà, èsi anc ina giada pli legraivel che la bilantscha è positiva.
Ultim quint annual dad Urs Marti
Per l'ultima giada ha Urs Marti preschentà las cifras da la citad da Cuira. El sa retira la fin da l'onn da ses uffizi da president, quai suenter 12 onns en uffizi. Il zercladur elegia il suveran da Cuira tgi che maina vinavant la citad – i dat diversas candidatas e candidats.
Urs Marti aveva surpiglià las finanzas da la citad da Cuira cun cifras cotschnas. Uschia ch'el ha il 2013 suenter gnanc in onn en uffizi stuì preschentar mesiras da spargn. Mintgin mettia auter las prioritads, ha Marti ditg, sia finamira saja stada, da cuntanscher ina equivalenza en las differentas spartas, sco per exempel cultura, sport u furmaziun. Quai haja el cuntanschì, mintga sparta haja ina giada stuì laschar in per plimas.
Tut en tut è la bilantscha dals ultims bunamain 12 onns sco president da la citad da Cuira positiva. Cun bleras persunas ch'hajan gidà, haja el dastgà gulivar las finanzas da la chapitala grischuna. Persunalmain è il president partent satisfatg, d'avair dastgà sviluppar e transfurmar la citad da Cuira, e quai betg sin ils custs da las proximas generaziuns. Durant ses temp d'uffizi n'haja dà nagin augment da la taglia. Ins haja pudì metter accents en tut ils champs.
Jau sun da l’opiniun che la citad da Cuira è sa midada en moda e maniera positiva.
