Differentas sfidas occupan il management persistent d'aua: Prestaziuns finanziablas da l'infrastructura da l'aua, utilisaziuns pli effizientas per process industrials ed utilisaziuns da l'aua a l'exteriur. Questas sfidas vegnan accentuadas da la midada dal clima.
Per che cunzunt la vart politica saja sin il stan il pli nov da la scienza, ha gì lieu ils 12 da favrer 2025 per la segunda giada la conferenza «Blue Summit Switzerland» a Rehanau.
Nus avain constatà che la perscrutaziun discurra memia pauc cun la politica ed il cuntrari. Uschia na dispona la politica betg adina da la savida correcta u actuala.
Avant quatter onns ha gì lieu l'emprim «Blue Summit Switzerland», entras corona en furma pli pitschna e be online. Quest onn èn bunamain 80 participantas e participants stads preschents, sper persunas d'administraziuns ed interpresas che s'occupan da la tematica da l'aua, er cussegliers guvernativs, cussegliers naziunals e cussegliers dals chantuns da tut la Svizra.
Ils scienziads e las scienziadas han mussà en referats differents aspects da la situaziun svizra areguard l'aua. Tranter auter èsi vegnì infurmà davart l'impurtanza da l'infrastructura, vul dir davart reservuars, bischens e sistems per auas persas. La midada dal clima per exempel chaschunia oz quantitads da plievgia pli grondas en in temp pli curt, e quai engrevgeschia ils sistems d'aua persa ed uschia possian capitar dapli inundaziuns.
Suenter ils referats dals experts han ils represchentants da la politica discutà davart propostas da soluziuns pussaivlas. Concretamain na possian ils organisaturs da la conferenza actualmain anc betg dir tge pass ch'il «Blue Summit Switzerland» ha instradà per il futur. La gronda part da las persunas ord la politica sajan dentant d'accord da sa fatschentar cun las tematicas discutadas e da chattar soluziuns.
Uschia vegnia l'organisaziun ad observar ils proxims pass da la vart politica per pudair valitar ils resultats concrets. La proxima conferenza è planisà en dus onns.