Il Verkehrshaus a Lucerna sa deditgescha cumplettamain al traffic, il Technorama a Winterthur als fenomens da natira e tecnica – e cun la Biblioteca mundiala d'aua (Welt-Wasser-Bibliothek) ha la Svizra dapi quest november ina chasa che sa deditgescha dal tuttafatg a la resursa aua. Quella sa chatta en la veglia posta dal chastè Reichenau – exact là nua ch'il Rain posteriur ed il Rain Anteriur vegnan ensemen.
L'iniziant da la biblioteca n'è nagina gronda surpresa: L'enconuschent activist per l'aua Ernst Bromeis e sia uniun «Grischun Aua». Tenor l'Engiadinais saja la tematica da l'aua pervia da la midada dal clima uschè actuala sco anc mai. La maioritad dals problems hajan numnadamain in connex cun l'aua: inundaziuns, bovas, setgiras u il regress dals glatschers. Perquai dovri tenor Ernst Bromeis in'instituziun che po sensibilisar davart la tematica ed esser ina plattafurma per vegnir ensemen, discutar problems e chattar schliaziuns.
La Confederaziun è medemamain persvadida ch'i dovria ina tala Biblioteca d'aua. Perquai sustegna la Direcziun da svilup e collavuraziun DEZA la biblioteca concepziunalmain sco era finanzialmain cun 150'000 francs durant in onn e mez. Quai per il motiv che la Svizra possia e duaja sa prestar ina tala instituziun che possia speranza esser in exempel per auters pajais.
Grondas visiuns per il futur da la biblioteca
En la biblioteca datti natiralmain differents cudeschs davart l'aua. Quels vegnan – grazia als contacts internaziunals da la DEZA – da tut il mund. Vinavant èn da vesair ovras ed installaziuns d'art. Era locals per vegnir ensemen e far brainstorming datti. La biblioteca vul dentant cunzunt er nizzegiar ses conturn cun ils flums. Uschia duajan ins en l'avegnir pudair far ina pitschna tura enturn la biblioteca cun differents posts ch'han in connex cun l'aua.
Pussaivel saja bler – ins stettia dentant pir a l'entschatta, di Ernst Bromeis. La speranza saja, d'in di esser in'instituziun ch'è relevanta per il sistem. Ernst Bromeis ha bleras visiuns, ma per il mument saja el cuntent che la tematica da l'aua saja arrivada en nossa societad e betg pli mo in tema da nischa d'organisaziuns d'ambient u da tschertas partidas. La Biblioteca mundiala d'aua duai esser in ulteriur pass per chattar respostas en quest connex.
Or da l'archiv:
