La citad duai funcziunar sco ina spungia, uschia Carlo Ursprung da l'Uffizi da construcziun bassa a Cuira. Quai vul dir che l'aua da plievgia vegn accumulada localmain e pli tard puspè surdada a la circulaziun natirala. Uschia na duai l'aua da plievgia netta betg simplamain vegnir en la chanalisaziun, mabain vegnir duvrada per parcs e plantas che gidan tras la svapuraziun da sbassar las temperaturas.
Era a Cuira è gia vegnì realisà in u l'auter project tenor questa metoda.
Per exempel èn ils passapes tar la rundella da Masans vegnids construids uschia che l'aua da plievgia cula en las eras verdas.
Questas mesiras n'hajan betg mo in effect positiv sin il clima da la citad, mabain reduceschian er ils custs perquai che damain aua vegnia manada en las sereneras.
A Cuira èn las mesiras or dal concept «citad da spungia» plitost novas, perquai na pon ins anc betg dir bler davart las consequenzas a lunga vista. Auter èsi a Berna, nua ch'i dat gia dapi in temp mesiras persistentas tenor il concept «citad da spungia». Tras examinaziuns cun cameras termicas han ins pudì mussar là che plazzas ch'èn vegnidas construidas tenor quest concept èn marcantamain pli frestgas che talas senza.
Far visibel il process da la «citad da spungia»
Cun in model da miniatura d'ina «citad da spungia», l'uschenumnada «Pocket-Schwammstadt», vul la citad da Cuira far attent la populaziun al concept innovativ e declerar quel. Dapi questa stad stat il model en la Poststrasse a Cuira. En la chista da lain creschan differentas plantas che vegnan sauadas tras in chanal dal tetg. L'aua vegn rimnada e cun agid d'ina pumpa vegn ella dada enavos a las plantas mintga sis uras. La pumpa vegn manada tras ina cella solara. Duvrada vegn la pumpa oravant tut per sauar las plantas en la verticala.
Tavlas sper il model infurmeschan ils interessads davart il concept e davart pussaivladads da chattar ulteriuras infurmaziuns.