2'740 persunas èn sa radunadas sonda en la Stadthalle a Cuira a la 37avla radunanza da scrits da participaziun da la Banca Chantunala Grischuna. La sala è stada a plaina enfin sin l’ultima plazza ed intginas persunas eran perfin sin la glista da spetga. La radunanza è averta per mintga persuna che posseda in scrit da participaziun da la Banca Chantunala. L’atmosfera en la sala plain maisas da festa era fitg buna e cun las moderaziuns, ils discurs, il divertiment musical e las purschidas culinaricas na pareva la radunanza betg sco ina scuntrada da banca mabain pli fitg sco ina gronda festa.
-
Bild 1 von 4. Bildquelle: RTR.
-
Bild 2 von 4. Bildquelle: RTR.
-
Bild 3 von 4. Bildquelle: RTR.
-
Bild 4 von 4. Bildquelle: RTR.
Banca Chantunala vul manetgnir las radunanzas era en l'avegnir
Entant che bleras bancas han abolì u digitalisà fermamain lur radunanzas da participants e participantas, sa tegna la Banca Chantunala vinavant vi dal format tradiziunal – e quai cun blera lavur logistica e persunala. La 37avla radunanza participaziun ha gì en tut 330 maisas da festa cun 2'840 sutgas, 5'680 magiels ed en tut han gidà passa 320 persunas e per il catering èn stadas responsablas 180 persunas.
Igl è fitg impurtant en in mund digital da pussibilitar muments nua ch'i dat inscunters persunals. Era sche tschertas tradiziuns paran forsa antiquadas, hai ina valur da sviluppar e mantegnair ellas era en futur.
En egl ha dà il public predominantamain pli vegl, fidaivel e che resenta l'occurrenza er sco eveniment da la societad. Bleras persunas vegnan dapi passa 20 onns regularmain a la radunanza perquai ch'ella è era in revesair, in mument da cumpagnia e porscha in program culinaric e musical che para da plaschair.