La regenza grischuna ha deliberà ina strategia chantunala «dependenzas». I dettia gia ina rait da purschidas e posts per persunas pertutgadas. La strategia duai megliurar la collavuraziun e far pli lev l'access.
La finamira è d'ina vart da promover e da mantegnair la sanadad da la populaziun. Da l'autra vart vai per mitigiar las consequenzas d'ina dependenza per las persunas pertutgadas e per lur ambient social.
Megliera coordinaziun
La strategia duai gidar da coordinar la lavur da differents posts e differentas autoritads. Ella reparta cumpetenzas en l'administraziun chantunala, e duai gidar da sviluppar e controllar il success dals programs cunter dependenzas.
La strategia sa basa sin la strategia naziunala cunter dependenza. Tuttina sco tar la strategia naziunala giaja per la prevenziun, la terapia, la reducziun da donns e la repressiun, scriva la regenza.
Sensibilisar la populaziun
Ina gronda part da la populaziun consumeschia substanzas legalas, sco alcohol, tubac u medicaments, dovra l'internet u sa participescha a gieus da fortuna, senza periclitar sasezza ed auters, scriva la regenza vinavant. Intginas persunas s'exponian dentant a ristgas u perdian la controlla davart lur consum u davart lur cumportament. Ultra da quai vegnian consumadas substanzas illegalas u che substanzas vegnan maschadadas.
Perquai vul la regenza sensibilisar la populaziun per la tematica da dependenzas. La cumpetenza en chaussas da la sanadad duai vegnir rinforzada en tut las classas da vegliadetgna. Las mesiras da la promoziun da la sanadad e da la prevenziun da dependenzas han en mira las famiglias, la scola, il temp liber e las plazzas da lavur.
Dependenzas chaschunan custs da 7,7 milliardas francs ad onn
Tenor in studi elavurà per incumbensa da l'Uffizi federal da sanadad publica chaschunan las dependenzas en Svizra custs da 7,7 milliardas francs per onn per la societad. Mintga settavel mortori en Svizra ha in connex cun il fimar, il motiv zuppà da mintga sisavla diagnosa psichiatrica è in problem d'alcohol e tar la mesadad da tut ils delicts gioga l'alcohol ina rolla.
