En il Grischun èn sa registrads enfin oz radund 1'000 fugitivs da l'Ucraina. Blers dad els èn bain scolads e grazia al status da protecziun S dastgan els era lavurar. Tar ils Centers regiunals per intermediaziun da lavur èn enfin oz s'annunziads mo radund 20 Ucranais ed Ucranaisas, ha ditg Gian Reto Caduff al schurnal regiunal da SRF. Il manader da l'Uffizi per industria, mastergn e lavur declera vinavant che las enconuschientschas da la lingua sajan la pli gronda difficultad.
Enfin oz han radund 15 Ucranaisas ed Ucranais chattà ina plazza da lavur en il Grischun. Tranter quels èn duas forzas da lavur fitg qualifitgadas, in informaticher ed ina media assistenta.
