La BBC britannica ha scrit ils 9 da matg davart l'evacuaziun dal vitg svizzer Brienz: «Swiss village of Brienz told to flee imminent monster rockslide». Per rumantsch: Vitg svizzer Brienz sto scappar da ruschnada da grip imminenta.
Suenter l'evacuaziun han els lura rapportà che tut ils abitants ed abitantas sajan evacuadas – ed era las vatgas.
La Washington Post dals Stadis Unids scriva ils 11 da matg dad ina muntogna svizra che pudess collabar e dal vitg che giascha en via. «A Swiss mountain could collapse. This village lies in its path.» L'artitgel tracta da las Alps che sa movan dapi il temp da glatsch, l'evacuaziun che stat avant porta e dals scenaris pussibels.
En la Nova Zelanda vegn Brinzauls tematisà en il New Zealand Herald ils 15 da matg. L'artitgel cuntegn ina survista da la situaziun, ils schabetgs ed istorgias da l'evacuaziun.
The Island Online da Sri Lanka rapporta da Brinzauls sa referind sin la reportascha da la BBC. In curt artitgel, ma probabel il pli nunspetgà lieu menziunà en quest artitgel che s'interessescha per noss vitgs.
Germania
La Süddeutsche Zeitung ha gia publitgà plirs artitgels davart Brinzauls.
Era l'emissiun tudestga Spiegel rapporta ils 11 da matg: «Ein Dorf droht zermalmt zu werden». Per evitar malchapientschas mettan els a lieu Brinzauls «datiers da Tavau».
La gasetta tudestga Bild dovra ils 10 da matg fermas expressiuns: «Ein Blick auf dieses Foto reicht, um es mit der Angst zu tun zu bekommen!» cun il titel «Cumplet vitg en la Svizra sto translocar».
Für eine Sekunde sieht es idyllisch aus, ab der zweiten kommt der Schrecken: Brienz in der Schweiz ist akut bedroht von der grauen Gewalt dieses Felsens.
En lur descripziun schai Brinzauls radund 25 kilometers lingia d'aria en il sidvest da Tavau sin 1'100 meters sur mar. Ed il vitg na saja betg da scumbigliar cun il Brienz enconuschent datiers dad Interlaken al Lai da Brienz.
In fauxpas ch'ha sensibilisà capita en la redacziun da Focus online . Là vegn publitgà in fauss maletg – da Brienz al Lai da Brienz. Suenter reacziuns da lecturs han els midà il maletg. Sco quai ch'il Blick rapporta hajan turists e turistas contactà Brienz BE per dumandar sch'els stoppian stuschar lur vacanzas. Il tweet per guardar las respostas:
Er l'emettur RTL ha rapportà en las novitads da l'evacuaziun.
Austria
En l'Austria scriva l' ORF ils 10 da matg: «Muntogna smanatscha da sutterrar vitg svizzer». Els han fatg atgnas graficas è mussà il lieu sin ina carta, ins chatta era ina contribuziun da televisiun.
Tar Vol.at en il Vorarlberg para sin l'emprima egliada la fasa blaua gia ad esser activa ils 17 da matg: «Alarmstufe Blau in Brienz». Tenor ils auturs sa preparan ils responsabels per la pli auta fasa da privel. Ils auturs cumpareglian il volumen dal grip cun 2'000 chasas dad ina famiglia.
La Kleine Zeitung scriva ils 16 da matg che Brinzauls preparia la fasa blau. Ina recapitulaziun cun carta interactiva e plirs videos èn preschents online.
Era in curt artitgel ha la OÖN publitgà ils 11 da matg. Era els fan la segira ch'ils lecturs na scumbiglian betg ils Brienzs.
Brienz am See
Il num tudestg da Brinzauls è «Brienz». In ulteriur Brienz sa chatta en il chantun Berna sper il Lai da Brienz. Sco ch'ina novitad sin la pagina online da la vischnanca bernaisa mussa, ha la rapportaziun da las medias internaziunalas chaschunà malchapientschas.
Preziads giasts
Actualmain vegn rapportà en las medias bler davart la bova imminenta en la vischnanca Brinzauls en il chantun Grischun – per plaschair resguardai che la vischnanca da Brinzauls en il chantun Grischun sa chatta var 231 kilometers lunsch davent da noss Brienz sper il lai en il chantun Berna. A Brinzauls sper il lai en il chantun Berna n'exista nagin privel .
brienz.ch