Dus e mez mais suenter ch'el è vegnì elegì ha lieu a Washington la saramentaziun dal 47avel president american, il republican Donald Trump. Il president democrat Joe Biden surdat quest glindesdi saira suenter quatter onns en uffizi las fatschentas da la regenza a Trump. Igl è in di plain termins e puncts da program. Uschia ha cumenzà il di a Washington D.C. cun in servetsch divin. La gronda ceremonia da la saramentaziun (a las 18:00 temp svizzer) ha gì lieu dadens.
La saramentaziun en maletgs
-
Bild 1 von 9Legenda: Durant l'avantmezdi dals 20 da schaner arriva il nov president e sia first lady tar la chas'alva a Washington D.C. Keystone -
Bild 2 von 9Legenda: Pervia da las temperaturas fraidas ha la saramentaziun lieu en il Capitol. Keystone
-
Bild 3 von 9Legenda: Sin la plazza davant il Capitol resti perquai quiet. Ils fans da Trump celebreschan en salas e hallas en tut il pajais. Keystone
-
Bild 4 von 9Legenda: Sin la glista da giasts da la saramentaziun sa chattan bleras persunas prominentas, tranter els er – sco ch'igl è tradiziun – anteriurs presidents dals Stadis Unids. Keystone
-
Bild 5 von 9Legenda: Dentant er milliardaris ord la branscha da tecnologia eran envidads. Sper il grond sustegnider da Trump, Elon Musk (dretga) ed il CEO da Google, Sundar Pichai (san.), era er Mark Zuckerberg, il CEO da Facebook, preschent. Keystone
-
Bild 6 von 9Legenda: J.D. Vance, il nov vicepresident dals Stadis Unids, engira. Keystone
-
Bild 7 von 9Legenda: E curt suenter è er el (puspè) vidlonder: Donald Trump daventa uffizialmain il 47avel president dals Stadis Unids. Keystone
-
Bild 8 von 9Legenda: Curt suenter la saramentaziun prendan Joe e Jill Biden cumià da la chas'alva... Keystone
-
Bild 9 von 9Legenda: ... fertant ch'i spetgan sin els dus anc numerusas occurrenzas ed era in pèr documents ch'els ston e vulan suttascriver. Keystone
Suenter avair engirà ha Donald Trump tegnì ses pled uffizial e cumenza cun ils suandants pleds:
Il temp dad aur per l'America cumenza.
Trump empermetta ina «unda da midadas» che vegn ad ir sur ils Stadis Unids e sur tut il mund. En in pled attatgant discurra el da vulair meglierar il pajais. Uschia n'haja la regenza da Joe Biden per exempel betg protegì la populaziun, per exempel durant ils huricans a North Carolina. El vul midar quai. «Dieu ha salvà mai per manar enavos ils Stadis Unids a veglia grondezza e fermezza», di el en ses pled.
Lura annunzia Donald Trump emprima mesiras concretas, tranter auter las suandantas.
- El veglia clamar or il stadi d'urgenza tar il cunfin cun il Mexico. Tut ils criminals e las criminalas da l'exteriur duain vegnir repatriads – er cun l'agid da l'armada. El discurra da deportaziun per milliuns da persunas. Curt suenter la saramentaziun è ina app per migrants per far termins tar ils posts da cunfins vegnì serrada.
- Plinavant vul el far ina fin al «green deal». Trump vul nizzegiar las reservas dad ieli e gas per sbassar ils pretschs d'energia. El vul er extrar da la cunvegna da clima da Paris – sco ch'el ha gia fatg quai durant ses emprim temp d'uffizi.
- Sia regenza vegnia ad introducir dazis che n'influenzeschan betg ils pretschs per la populaziun. Uschia quinta il 47avel president dals Stadis Unids cun «enormas summas da raps».
- Il Canal da Panama duai puspè vegnir sut controlla dals Stadis Unids. Actualmain controlleschia la China il canal che passa tranter l'America dal Sid e dal Nord, uschia Trump.
- Plinavant vul el midar il num dal «Golf da Mexico» sin «Golf da l'America». Ed el veglia «purtar enavant la bandiera americana», uschia per exempel sin il planet mars.
- En futur duai dar be dus genders en ils Stadis Unids – masculin e feminin.
Gia ordavant avevan ils collegas dad SRF discurrì davart las mesiras cun la politologa tudestga ed experta dals Stadis Unids Sarah Wagner. Ella i ch'ins stoppia cunzunt quintar cun mesiras diras tar la politica da migraziun – in tema da paisa da Trump era gia el cumbat electoral. Plinavant metta ella a lieu tgeninas mesiras ch'èn propi realisticas e tgeninas che Donald Trump dovra plitost per survegnir attenziun.
Joe Biden e Kamala Harris bandunan Washington D.C.
Suenter in pau musica ed il imni naziunal han Joe Biden e Kamala Harris uffizialmain prendì cumià. Avant ha Biden anc concedì amnestia (tud. «begnadigen») a numerusas persunas, tranter auter sia atgna familia, dentant er persunas ch'èn sa mess cleramain cunter Donald Trump. Uschia vul el evitar consequenzas nauscher per quellas persunas. Pli tard s'annunzia Biden anc ina giada en scrit e motivescha a ses aderents da betg dar si. Ins haja tadlà il pled da Trump ed ins vesa ch'i dettia anc bler da far, uschia l'anteriur president.
Fertant ch'ils Bidens sa mettan en viadi, entra Donald Trump en il «oval office», nua ch'el suttascriva emprims documents. Tradiziunalmain èn quai documents da nominaziun, memorandums u proclamaziuns, dentant er intgins documents per sias mesiras.
En il decurs dal di inspectescha il nov president cun ses vicepresident differentas unitads dal militar american durant in marsch da parada tar il capitol. A lez suonda la parada dal president che maina tradiziunalmain tranter il capitol ed la chasa alva. Pervi da l'aura fraida ha quella uss dentant era lieu endadens en l'arena da sport a Washington. Il di va a fin cun trais bals da musica e sauts festivs ch'han lieu la saira.
Mesiras da segirtad enormas
Las mesiras da segirezza per la saramentaziun èn enormas: Passa 25'000 policists e schuldads vegnan ad esser en acziun. Bunamain 50 kilometers saivs da protecziun èn vegnidas erigidas en il center da la chapitala Washington. Il Secret Service discurra dal pli grond dispositiv da segirezza per ina saramentaziun en l’istorgia dals Stadis Unids.
Tge influenza ha l'elecziun da Trump per il Grischun?
La politica e l'economia grischuna ha reagì e declaran tge che la reelecziun da Trump pudess muntar per la Svizra u era per il Grischun. Tranter auter partan ils dus politichers grischuns Jon Pult e Roman Hug lur vista envers RTR: