Suenter l'attatga sin l'anteriur president american Donald Trump ha l'FBI entant identifitgà il tiradur. I sa tractia da Matthew Crooks, in giuven da 20 onns da Pennsylvania. Quel ha dà giu plirs sajets durant in pled da Donald Trump tar in'occurrenza per il cumbat electoral en la citad Butler a Pennsylvania. Quai conferma il Secret service. Ins haja eliminà l'attentader, el saja mort. In aspectatur da 50 onns saja medemamain vegnì mazzà, dus ulteriurs sajan blessads. Investigaturs èn actualmain vi d'eruir intensivamain il motiv per l'attentat empruvà.
Tenor las indicaziuns d'investigaturs da l'FBI abitava il delinquent Matthew Crooks a Bethel Park – ina citad circa 70 kilometers davent da Butler, nua che l'occurrenza e l'attentat han gì lieu.
A Bethel Park è gia in tozzel autos da polizia ed ulteriurs experts sa rimà avant la chasa, nua ch'il delinquent abitava. Tut ils detagls vegnan examinads intensivamain il mument.
Tenor documents da la cumissiun electorala haja Matthew Crooks fatg cun 17 onns ina donaziun da 15 dollars a l'organisaziun politicamain senestra «ActBlue». Quest onn saja el dentant registrà sco republican.
En in statement via sia plattafurma «Truth social» scriva Trump ch'ina balla haja tutgà sia ureglia dretga. Sin registraziuns da video èsi d'udir plirs sajets. Commembers dal Secret service curran sinaquai sin tribuna e protegian Donald Trump.
Tenor in video da la campagna dal cumbat electoral da Donald Trump sin la plattafurma X, haja l'anteriur president american gia bandunà Pennsylvania cun ses aviun privat frestg vestgì. «Ferm ed indestruibel. El na vegn mai a chalar da cumbatter per l'America», ha sia vicedirectura da la communicaziun commentà il video.
Biden condemnescha l'attatga
Il president en uffizi, Joe Biden, ha reagì sin l'attatga sin ses contrahent. En ils Stadis Unids na dettia nagin plaz per tala violenza, ha Biden ditg tar ina conferenza da medias ch'è vegnida organisada a curta vista. Ins na dastgia betg lubir talas attatgas e mintgina e mintgin stoppia condemnar l'attatga. Entant ha Biden ditg ch'el haja telefonà cun Donald Trump. Detagls n'ha el però betg numnà.
Er anteriurs presidents americans sco Barak Obama, George Bush u Bill Clinton han condemnà l'attatga sin Trump. Ulteriuras reacziuns hai er dà dad ulteriurs schefs da stadi e da regenza. Uschia ha il nov prim-minister britannic Keir Starmer declerà ch'el saja schoccà. Il prim-minister israelian Benjamin Netanjahu ha giavischà a Trump ina sperta reconvalescenza.
Viola Amherd numna attatga «inacceptabel»
La presidenta da la Confederaziun, Viola Amherd, ha scrit sin la plattafurma X ch'ella saja «schoccada» da la novitad da l'attentat a Pennsylvania. Violenza en la politica saja «cunter tut las valurs democratas ed inacceptabel», scriva ella vinavant. La Svizra tramettia buns patratgs a Donald Trump, las unfrendas e lur famiglias, sco er al pievel american.
Jau giavisch a l'anteriur president ch'el è svelt puspè saun.
President da la PLD cun clers pleds
Er ils politichers svizzers prendan posiziun cunter l'act da violenza a Pennsylvania. L'attentat sin l'anteriur president Donald Trum saja «schoccant», scriva Thierry Burkart, il president da la PLD sin la plattafurma X. «La culpa tutga adina il delinquent», ma er ils responsabels da las partidas politicas en l'America hajan uss la responsabladad da ponderar, co unir la populaziun spartida.
Ferma critica d'Olaf Scholz
Il chancelier da la Republica Federala Tudestga Olaf Scholz ha giavischà in bun meglierament al candidat Donald Trump sin la plattafurma X. «Tals acts da violenza pericliteschan la democrazia», cuntinuescha Scholz. L'attentat sin l'anteriur president saja «condemnabel». El parta era giavischs da condolientscha per las persunas, ch'èn vegnidas donnegiadas da l'attatga.
Secretari general da la NATO è «schoccà»
Jens Stoltenberg, secretari general da la Nato, ha parti sia consternaziun sin la plattafurma X. El saja «schoccà» da l'attentat sin il candidat republican. El giavischia a Trump ch'el saja bainspert puspè en pe, cuntinuescha il Norvegiais. Ses patratgs sajan tar tut ils pertutgads.
