L'anteriur president american Donald Trump na dastga betg sa participar a las preelecziuns per il presidi american en il stadi Maine. Quai ha decis l'autoritad d'elecziuns dal stadi federativ en il nordost dals Stadis Unids.
La dumonda da Trump per las preelecziuns saja «nunvalaivla», scriva la secretaria dal stadi Maine Shenna Bellows. Tenor ina agiunta da la constituziun saja Trump «betg qualifitgà» per l'uffizi dal president. Persunas ch'han preparà ina revolta cunter la constituziun sajan excludidas da las preelecziuns.
Tar in pled ils 6 da schaner 2021 aveva Donald Trump instigà aderentas ed aderents, suenter ch'el aveva perdì las elecziuns. Sias aderentas ed aderentes avevan silsuenter occupà il parlament dals Stadis Unids.
Gia avant in'emna aveva Colorado sclaus Trump da las preelecziuns. Encunter quella decisiun ha el appellà. Er encunter la decisiun da Maine po vegnir fatg recurs. Er en auters stadis emprovan planschiders e planschidras da stritgar il num da Donald Trump or da la glista per las preelecziuns.
